నాన్నకు ప్రేమతో...

అమ్మాయిలకు నాన్నే మొదటి హీరో అంటారు. మరి రియల్‌లైఫ్‌లోని తమ మొదటి హీరో గురించి ఈ హీరోయిన్లు ఏం చెబుతున్నారంటే...

Published : 19 Jun 2022 00:12 IST

నాన్నకు ప్రేమతో...

అమ్మాయిలకు నాన్నే మొదటి హీరో అంటారు. మరి రియల్‌లైఫ్‌లోని తమ మొదటి హీరో గురించి ఈ హీరోయిన్లు ఏం చెబుతున్నారంటే...

ఎప్పుడూ నవ్వుతూనే ఉంటారు

- పూజా హెగ్డే

మా నాన్న మంజునాథ హెగ్డే న్యాయవాది. చిన్నప్పటినుంచీ మా నాన్నను సీరియస్‌గా చూసిన సందర్భాలు చాలా తక్కువ. ఎందుకంటే.. ఆయన ఎప్పుడూ నవ్వుతూ, నవ్విస్తూ చాలా సరదాగా ఉంటారు. నాకు ఊహ తెలిసినప్పటినుంచీ ఇప్పటివరకూ నాన్నలాంటి వ్యక్తిని అస్సలు చూడలేదు. నన్నూ, అన్నయ్యనూ కూర్చోబెట్టుకుని రకరకాల కథల్ని కళ్లకు కట్టినట్లుగా చెప్పడం, జోకులు వేయడం.. ఇలా నాన్నతో మాకు చెప్పలేనన్ని జ్ఞాపకాలు ఉన్నాయి. ఎంత పెద్ద సమస్య ఎదురైనా సరే దాన్ని నవ్వుతూనే పరిష్కరించుకుంటారు తప్ప బాధ, కోపం.. వంటివి ఆయన ముఖంలో కనిపించవు. మా నాన్న నుంచి ఏదయినా వారసత్వంగా అందుకోమంటే ఆయనలోని హాస్యచతురతనే కోరుకుంటా. చిన్నప్పటినుంచీ నాన్నను చూస్తూ పెరిగిన నేనూ... ఆయన్నే ఆదర్శంగా తీసుకున్నా. ఎంత పని ఉన్నా, షూటింగ్‌లతో విశ్రాంతి లేకపోయినా సరే వీలైనంతవరకూ ఒత్తిడికి లోను కాకుండా ఉండేందుకే ప్రయత్నిస్తుంటా.


పర్సులో డబ్బులు తీసేదాన్ని

- కీర్తి సురేష్‌

సెట్లో దర్శకుడి నుంచి స్పాట్‌బాయ్‌ వరకూ అందరినీ సమానంగా చూడటం, సరదాగా ఉండటం, చెప్పిన సమయానికి షూటింగ్‌కి వెళ్లడం, ఒత్తిడి, చిరాకు లాంటివి ముఖంమీద కనిపించనీయకపోవడం... ఇవన్నీ నాకు మా నాన్న సురేష్‌ కుమార్‌ నుంచే వచ్చాయి. నాన్న నిర్మాతగా, నటుడిగా పేరు తెచ్చుకున్నా చాలా సింపుల్‌గా ఉండటం నాకు నచ్చుతుంది. అందుకే నేనూ ఆయనలానే ఉండేందుకు ఇష్టపడుతుంటా. మొదటిసారి షూటింగ్‌కు వెళ్తున్నప్పుడు నాన్న ‘మన ప్రవర్తన జాగ్రత్తగా ఉండాలి’ అన్నారు. ఆ మాటల్ని నేను ఎప్పటికీ మర్చిపోను. ఇప్పుడంటే నేనూ సంపాదిస్తున్నా కానీ చిన్నప్పుడు నాన్న పర్సులో డబ్బులు తీసేయడం... దానికి నాన్న మందలించడం నాకు ఇప్పటికీ గుర్తే.


ఆ క్రమశిక్షణ నాన్న నేర్పిందే

- నయనతార

పనిలో రాజీపడకపోవడం, సమయపాలనకు ప్రాధాన్యం ఇవ్వడం, క్రమశిక్షణ... ఇవన్నీ నాకు మా నాన్న కురియన్‌ నుంచే వచ్చాయి. ఆయన ఎయిర్‌ఫోర్స్‌ అధికారిగా చేసేవారు. ఒకప్పుడు ఆయన క్రమశిక్షణకూ, సమయపాలనకూ మారుపేరు. రోజూ పొద్దున్నే యూనిఫాంలో ఠీవిగా ఆఫీసుకు వెళ్లే ఓ పర్‌ఫెక్ట్‌మ్యాన్‌ మా నాన్న. అలాంటి నాన్న కొన్నాళ్లుగా అనారోగ్యంతో బాధపడుతున్నారు. అందుకే ఆయనతో ఎక్కువగా గడపాలని కోరుకుంటున్నా. నాకు కాలాన్ని వెనక్కి తిప్పే అవకాశం వస్తే గనుక.. ఆయన్ని పూర్తి ఆరోగ్యవంతుడిలా మార్చేయాలని కోరుకుంటా. నేను ఈ రోజు ఇలా ఉన్నానంటే దానికి ఆయనే కారణం. మా నాన్నే నాకు హీరో మరి.


ఆయన ఇచ్చే ధైర్యమే వేరు

- సాయి పల్లవి

చాలామంది నేను ఎప్పుడూ నవ్వుతూ, సరదాగా, ఉత్సాహంగా ఉంటానని అంటూంటారు. వాటన్నింటి వెనుకా ఉన్నది మా నాన్నే. ఆయన ఇచ్చే దైర్యమే. మా నాన్న కన్నన్‌ పోలీసు విభాగంలో పని చేస్తున్నారు. ఆయన యూనిఫాం వేసుకున్నప్పుడు ఎంత కఠినంగా ఉంటారో తెలియదు కానీ.. ఇంట్లో మాత్రం సున్నితమనస్కుడే. నేను సినిమాలో ఏడ్చినా సరే ఆయన తట్టుకోలేరు. షూటింగ్‌లో భాగంగా వేరే చోట ఉన్నప్పుడు నాన్న నుంచి ఫోన్‌ వస్తే నేను కాస్త జాగ్రత్తగా మాట్లాడాల్సిందే. నేను ఏ మాత్రం డల్‌గా మాట్లాడినా కంగారుపడిపోయి వెంటనే ఇంటికొచ్చేయమంటారు. ఇంటికెళ్లానా అంతే, నాతో కబుర్లు చెబుతూ బాగా అలసిపోయానని నా కాళ్లు పట్టడం, తల మర్దన చేయడం ఇలా ఎన్నో చేస్తారు. ఒక్కోసారి ఆ ప్రేమ వింతగా అనిపిస్తుంది.


ఆ మాటలే స్ఫూర్తి

- దీపికా పదుకొణె

నాన్న ప్రకాశ్‌పదుకొణె ప్రపంచస్థాయి బ్యాడ్మింటన్‌ క్రీడాకారుడు అయినా చాలా సింపుల్‌గా ఉంటారు. ఓ క్రీడాకారుడిగా క్రీడల వల్ల లాభాలూ మాకు తరచూ చెప్పినా మేం కోరుకున్న రంగంలోనే ప్రోత్సహించారు తప్ప క్రీడలు ఎంచుకోవాలని చెప్పలేదు. ఇండస్ట్రీలోకి వచ్చిన కొత్తల్లో నాన్న ఓసారి ‘ఉన్నతస్థాయికి చేరాక మన ప్రవర్తన సరిగ్గా లేకపోతే ఎవరూ గుర్తుపెట్టుకోరు. మంచి వ్యక్తిగా ఎదిగితే మనం చేసే ప్రతి పనిలో ఆ మంచితనం కనిపిస్తుంద’ని చెప్పారు. నేను ఇప్పటికీ ఆ మాటల్ని గుర్తుపెట్టుకుంటా. నా వ్యక్తిత్వాన్ని ఎప్పటికప్పుడు సమీక్షించుకుంటూ... నాన్నలానే సింపుల్‌గా ఉండేందుకు ప్రయత్నిస్తుంటా.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

ఇంకా..