ఒక దేశం నుంచి మరో దేశానికి వెళ్లాలంటే వీసాలు, పాస్‌పోర్టులు, విమానం టిక్కెట్లు... కావాలి. కానీ, నాగాలాండ్‌లోని లోంగ్వా అనే గ్రామానికి వెళితే అవేవీ లేకుండానే దేశం సరిహద్దులు దాటడం చాలా తేలిక. ఈ గ్రామ పెద్ద ఇంట్లో బెడ్‌రూమ్‌ నుంచి వంటగదిలోకి వెళ్తే చాలు... దేశం సరిహద్దులు దాటినట్లే. కారణం ఇండియా- మయన్మార్‌ అంతర్జాతీయ సరిహద్దు లోంగ్వాలోని ఆ ఇంటి మధ్యలోంచి వెళ్తుంది. ఇంట్లో సగం అంటే పడక గదులు ఇండియాలోకి, కిచెన్‌ మయన్మార్‌ పరిధిలోకీ¨ వస్తాయి. అంటే ఆ ఇంట్లో వాళ్లు నిద్రలేచి టీ పెట్టుకోవడానికి వంటగదిలోకి వస్తే... దేశం దాటిపోయినట్లే! అంతేకాదు, భారత రాజ్యాంగం ద్వంద్వ పౌరసత్వాన్ని అనుమతించదు. కానీ, ప్రత్యేక భౌగోళిక పరిస్థితుల కారణంగా లోంగ్వా గ్రామస్థులకు ద్వంద్వ(ఇండియా- మయన్మార్‌) పౌరసత్వం ఉంటుంది. కోన్యాక్‌ నాగా తెగవాసులు నివసిస్తోన్న లోంగ్వా ఇప్పుడు పర్యటక ప్రాంతమైంది. వాళ్ల ఆచార వ్యవహారాలనూ, సరిహద్దు సంస్కృతినీ చూడటానికి పర్యటకులు బారులు తీరుతున్నారు.