ప్రచారం  కోసం కొన్ని కంపెనీలు తమ ఉత్పత్తులపైన సినీ తారల బొమ్మల్ని ఉంచడం చూసుంటారు. కొన్ని ఉత్పత్తులపైన వాటి యజమానుల బొమ్మలుండటమూ జ్ఞాపకమేగా! కానీ పారాచూట్‌ కొబ్బరి నూనె తయారీ సంస్థ మారికో మాత్రం రైతుల బొమ్మల్ని తమ బాటిళ్లపైన ముద్రించింది. దేశ ప్రగతిలో- ఆరుగాలం శ్రమించే రైతుది ప్రథమ స్థానమనీ, వారి శ్రమని అందరూ గుర్తించాలనీ ఈ ప్రయత్నం చేసిందా సంస్థ. వ్యవసాయంలో కొత్త ప్రయోగాలు చేస్తూ... లాభాల బాటలో నడుస్తూ పలువురికి ఆదర్శంగా నిలుస్తున్న- అశోకన్‌ అర్వింద్‌, మోతీ సింగ్‌, సందీప్‌ గీతే, వినోద్‌ కుమార్‌ల బొమ్మల్ని ఈ సంస్థ తాజాగా మార్కెట్‌లోకి తెచ్చిన కొబ్బరి నూనె బాటిళ్లపైన ముద్రించింది. ఆ రైతుల జీవితాలు మిగతా రంగాల్లో ఉన్నవారికి స్ఫూర్తి నివ్వాలనే ఉద్దేశంతో ప్యాక్‌ లోపల వారి విజయగాథల్ని ఓ కాగితంపైన ముద్రించి ఉంచింది కూడా. అంతేకాదు, ప్యాక్‌లో ఒక సీడ్‌ పేపర్‌నీ పెట్టింది మారికో సంస్థ. వాటిని నాటితే మొక్కలు వస్తాయి. అప్పుడైనా ఇప్పుడైనా ఎప్పుడైనా రైతే రాజు కదా!