సూర్యకిరణాల తాకిడికి మెరిసిపోయే బంగారు ఇసుక తిన్నెలూ... మధ్యలో ఆకుపచ్చ రంగులో తళుకులీనే నీటి జాడలూ... ఆ అందాల్ని ఆస్వాదించడానికి చుట్టూ ఎన్నెన్నో వసతులూ... ఇవీ పెరూలోని వాకచీనా అనే ఓ చిన్న ఊరి ముచ్చట్లు. ఎడారి మధ్యలో సహజసిద్ధంగా ఏర్పడిన సరస్సు చుట్టూ అల్లుకున్న ఈ చోటు- మంచి సందర్శక ప్రాంతం. వంద మంది జనాభా ఉన్న ఈ ఊళ్లో ఇళ్లతో పాటూ రెస్టరంట్లూ, హోటళ్లూ చాలానే ఉంటాయి. ఇక్కడి ఒయాసిస్‌లో సరదాగా పడవ ప్రయాణం చేయడానికీ ఇసుక దిబ్బలపైన డ్యూన్‌ బగ్గింగ్‌, శాండ్‌ బోర్డింగ్‌లాంటి సాహస క్రీడల్లో పోటీపడ్డానికీ... వేలాది పర్యటకులు కార్లూ, జీపులేసుకుని వచ్చేస్తుంటారు. ఎప్పుడూ నీటితో ఉండే ఈ ఒయాసిస్‌... అందానికే కాదు, వ్యాధుల్ని తగ్గించే ఔషధ గుణమున్న సరస్సుగానూ పేరుపొందింది. అందుకే పిల్లలూ, పెద్దలూ ఈ నీటిలో సరదాగా స్నానం చేసేస్తుంటారు!