ఎత్తైన కొండలే ఇరుపక్కలా రక్షకులుగా నిలబడినట్టూ, సముద్రతీరమే సరిహద్దుగా కనిపిస్తున్నట్టూ ఉన్న ఈ ఊరు ఎంతో అందంగా ఉంది కదూ. ‘సెయింట్‌ హెలెనా’ అనే దీవిలోని ఈ ఊరు అట్లాంటిక్‌ మహాసముద్రంలో ఉంది. మిగతా ప్రపంచానికి దూరంగా ఉన్న ఈ ఐలాండ్‌ అచ్చంగా ప్రకృతి ఒడిలో పుట్టినట్టుగా ఉంటుంది. అందుకే దీన్ని చూసినవారంతా ‘ఇదో కొత్త ప్రపంచం’ అని చెబుతుంటారు. 1502లో పోర్చుగీస్‌ నావికుడు కనిపెట్టిన ఈ దీవికి ఓ రోమన్‌ చక్రవర్తి తల్లి పేరును పెట్టారట. చిన్నపట్టణమంత విస్తీర్ణంలో ఉండే ఈ దీవిలో దాదాపు నాలుగువేలమంది జనాభా ఉంటారు. ఎత్తయిన కొండల నడుమ లోయలో ఉండే ఈ ఊరిలోకి దీవి పైనుంచి చేరాలంటే మాత్రం అంత సులువేం కాదు. పెద్దబావిలోపలికి మెట్లదారిలో వెళ్లినట్టుగా... ఈ ఊరిని చేరడానికి పొడవైన నిచ్చెనలాంటి దారిలో వెళ్లాలి. ఏది ఏమైనా, గజిబిజి జీవితాలను కాస్త పక్కనపెట్టి నాల్రోజులు ప్రశాంతంగా గడపాలనుకునే ప్రకృతిప్రేమికులకు ఇదో చక్కటి పర్యటక ప్రాంతం!