కార్తిక మాసం అనగానే శివాభిషేకాలూ, పార్వతీ పరమేశ్వరుల కల్యాణాలూ చూస్తుంటాం. కానీ జీడికల్‌ వీరాచలం రామచంద్రస్వామి ఆలయంలో మాత్రం ఎక్కడా లేని విధంగా సీతారామ కల్యాణాన్ని చేస్తారు. నెలరోజులపాటు కన్నులపండుగ్గా జాతరనూ నిర్వహిస్తారు. ఈ రాముడికి మీసాలు ఉండటం ప్రత్యేకం.

ఆహ్లాదకరమైన వాతావరణంలో వీరాచలం అనే కొండపైన వెలసిన ఈ మీసాల రాముడిని దర్శించుకుంటే సకల శుభాలు కలుగుతాయని భక్తుల నమ్మకం. ఈ వీరాచలం రామచంద్రస్వామి ఆలయం జనగాం జిల్లా లింగాల ఘనపురం మండలంలోని జీడికల్‌ అనే గ్రామంలో ఉంది.  

స్థలపురాణం  

త్రేతాయుగంలో వీరుడు అనే రుషి రాముడి కోసం తపస్సు చేశాడట. ఆ తపస్సుకు మెచ్చి స్వామి ప్రత్యక్షమైనప్పుడు... తనలో స్థిర నివాసం ఏర్పరచుకోమని కోరడంతో రాముడు సరేనంటూ అనుగ్రహించాడట. కొంతకాలానికి తండ్రికి ఇచ్చిన మాటను మన్నించి రాముడు - సీతాదేవి, లక్ష్మణుడి సమేతంగా అడవులకు వెళ్లాడు. ఆ సమయంలో మారీచుడు బంగారులేడి రూపంలో రావడంతో సీతాదేవి తనకు ఆ జింకను తెచ్చిపెట్టమని పట్టుబట్టింది. అలా రాముడు జింకను వేటాడుతూ ఈ ప్రాంతానికి వచ్చాడని అంటారు. చివరకు జింకపైకి బాణాన్ని సంధించడం వల్ల అందులోంచి రాక్షసుడు బయటకు వచ్చాడనీ... ఆ రాక్షసుడి దాహం తీర్చేందుకు ఈ ప్రాంతంలో ఓ చోట చేత్తో తడమడం వల్ల నీరు వచ్చిందనీ చెబుతారు. ఆ తరువాతే స్వామి ఇక్కడ స్వయంభువుగా వెలిశాడనీ పురాణగాథ.

పౌర్ణమి నుంచి జాతర...

ఈ ఆలయంలో స్వామి మీసాలతో ఉత్తరముఖాన దర్శనమిస్తాడు. గర్భగుడిలో స్వామి ముందు ఉన్న రామగుండంలోని నీరు ఎక్కడి నుంచి వస్తోందో ఇప్పటికీ అర్థంకాదని చెబుతారు ఆలయ నిర్వాహకులు. గుడి వెనుకభాగంలో ఉన్న పాల-జీడి గుండాల్లో స్నానం చేసి స్వామిని పూజిస్తే కోరిన కోర్కెలు నెరవేరతాయని భక్తుల నమ్మకం. ఇప్పటికీ రాక్షసుడి దాహం తీర్చేందుకు రాముడు తవ్విన ప్రాంతాన్ని పరిశుభ్రమైన వస్త్రంతో తుడిస్తే నీరు ఊరుతుందని అంటారు. ఈ గుట్టపైన వాల్మీకి గుహనూ హనుమంతుడి విగ్రహాలనూ దర్శించుకోవచ్చు. ఈ ఆలయంలో కార్తికంలోనూ స్వామికి కల్యాణాన్ని నిర్వహిస్తారు. అదేవిధంగా కార్తిక పౌర్ణమి నుంచి ఏకాదశి వరకూ పెద్ద ఎత్తున జరిగే జాతరలో పాల్గొనేందుకు వివిధ ప్రాంతాల నుంచి ఎంతోమంది భక్తులు తరలిరావడం విశేషం.  

ఎలా చేరుకోవచ్చు

ఈ ఆలయం హైదరాబాద్‌లోని శంషాబాద్‌ విమానాశ్రయం నుంచి 110 కిలోమీటర్ల దూరంలో ఉంటుంది. జనగాం వరకూ రైలు, రోడ్డు మార్గాల్లో  చేరుకుంటే అక్కడినుంచి ఆలయానికి ఆటోల్లో వెళ్లొచ్చు.   

- బి.మహేశ్‌ కుమార్‌, ఈనాడు డిజిటల్‌, హైదరాబాద్‌

ఇది విన్నారా...

శీర్షాసనంలో దర్శనమిచ్చే శివుడు

పరమేశ్వరుడు సాధారణంగా ఏ ఆలయంలో అయినా..లింగ రూపంలోనే దర్శనమిస్తాడు. ఆ శివలింగానికే సందర్భానుసారంగా అలంకరణలు చేస్తుంటారు. అలాంటి వాటన్నింటికీ భిన్నం ఈ శక్తీశ్వర స్వామి ఆలయం. ఎందుకంటే... పశ్చిమగోదావరి జిల్లా భీమవరంలోని యనమదుర్రు అనే ప్రాంతంలో ఉన్న ఈ ఆలయంలో పరమేశ్వరుడు శీర్షాసనంలో యోగముద్రలో దర్శనమిస్తాడు మరి. స్వామి పక్కనే పార్వతీదేవి పసిబాలుడైన సుబ్రహ్మణ్యేశ్వరుడిని ఒడిలో కూర్చోబెట్టుకుని ఆశీనురాలై ఉంటుంది. స్వామి ఈ రూపంలో కొలువుదీరడం వెనుక రెండు కథలు ప్రాచుర్యంలో ఉన్నాయి. యమధర్మరాజు స్వామికోసం తపస్సు చేసి.. ఉన్నపళంగా రమ్మని కోరాడట. ఆ సమయంలో స్వామి యోగముద్రలో శీర్షాసనంలో ఉన్నాడనీ.. అలాగే వచ్చి యముడిని అనుగ్రహించాడనీ ఓ కథనం. అలాగే శంబాసురుడు అనే రాక్షసుడు కేవలం యమధర్మరాజు చేతిలోనే మరణం పొందేలా వరం పొంది... ఆ తరువాత రుషుల్ని వేధించడం మొదలుపెట్టాడట. దాంతో రుషులు యమధర్మరాజును వేడుకోవడంతో యముడు ఆ అసురుడితో యుద్ధం చేయడం ఆరంభించినా క్రమంగా ఓడిపోయాడట. ఆ సమయంలో ఇంకా శక్తిని పొందేందుకు శివుడికోసం తపస్సు చేశాడు. అయితే... శివుడు యోగముద్రలో ఉండటంతో  పార్వతీదేవి వరాలు ఇచ్చిందనీ.. అలా ఆ అసురుడిని యముడు అంతమొందించాడనీ అంటారు. ఆయన కోరిక మేరకు శివుడు ఇక్కడ శీర్షాసనంలోనే వెలిశాడని కథనం. ఒకే పీఠంపైన శివుడు శక్తిసమేతంగా వెలిశాడు కాబట్టే ఈ ఆలయాన్ని శక్తీశ్వర క్షేత్రంగా పిలుస్తారు.