* మన ప్రపంచంలోని ఖండాలన్నీ ఇప్పటికీ ఏటా 2 సెం.మీ మేర... ముందుకు కదులుతూనే ఉన్నాయట!

* అమెరికా, కెనడా దేశాలకంటూ ప్రత్యేకంగా కోతి జాతులేవీ లేవు.అక్కడున్నవన్నీ ఇతర దేశాల నుంచి తెచ్చుకున్నవే!

* దిల్లీలోని సినిమా థియేటర్లలో ఒకప్పుడు మహిళలకి ప్రత్యేకమైన విభాగాలు ఉండేవి. మహిళల సీట్లు ఖాళీగా ఉండి, పురుషుల సెక్షన్‌ ఫుల్‌ అయినా సరే... మగవారిని అటువైపు పంపేవారు కాదు. ఇప్పటికీ కొన్ని థియేటర్లు ఈ పద్ధతిని పాటిస్తూనే ఉన్నాయి!

* శ్మశానాన్ని ఇంగ్లిషులో ‘సెమెట్రీ’ అని కూడా అంటారు. ఆ పదానికి అసలు అర్థం... డార్మిటరీ అని... అంటే నిద్రించే స్థలం అని!

* ప్రపంచంలోనే అతిపెద్ద నదీ లంక... బ్రహ్మపుత్రలో ఉంది. అసోం రాష్ట్రంలోని మజులీ అన్న ఈ లంకని 2016లో ఓ జిల్లాగా గుర్తించింది కేంద్రప్రభుత్వం. అలా చేయడం కూడా ప్రపంచంలో అదే తొలిసారి!

* అమెరికన్‌ రెస్టరంట్లలోకి షూస్‌ వేసుకుంటే మాత్రమే అనుమతిస్తారు... ఒట్టి కాళ్లతోనో, చెప్పులతోనో వెళితే ‘నో ఎంట్రీ’యే!

* 50 ఎకరాల స్థలంలో సుమారు 1.5 లక్షలమంది పాల్గొన్న ఓ పెళ్ళి విందు...గిన్నిస్‌ రికార్డుని సాధించింది. ఇప్పటిదాకా ఎవరూ బ్రేక్‌ చేయడానికి సాహసించని ఆ రికార్డు విందుని ఏర్పాటుచేసిన ఘనత... తమిళనాడు మాజీ ముఖ్యమంత్రి జయలలితది.ఆమె తన పెంపుడు కొడుకు పెళ్ళి సందర్భంగా 1995లో ఏర్పాటుచేసిన రిసెప్షన్‌ కార్యక్రమం అది!

* ఒకప్పుడు మనదేశంలో మొబైల్‌ ఎస్టీడీ కాల్స్‌ చేయాలంటే నంబర్‌ ముందు ‘0’ యాడ్‌ చేస్తుండేవాళ్లం కదా! చైనా, యూకేల్లో పక్కరాష్ట్రాలకే కాదు... లోకల్‌ కాల్స్‌ చేయాలన్నా జీరో వాడాల్సిందే. సున్నాతో కలిపి ఆ దేశంలోని మొబైల్‌ నంబర్లలోని మొత్తం అంకెలు 11!

* చైనాలో నోటితో ఈలవేస్తూ ధ్యానం చేసే పద్ధతి ఒకటుంది. ట్రాన్సెండెంటల్‌ విజిలింగ్‌ అని పిలిచే ఈల ధ్యానంతో... చుట్టూ ఉన్న జంతువులతోనూ మాట్లాడవచ్చన్నది చైనీయుల విశ్వాసం!

* ‘లైగర్‌’తో తెలుగుతెరకి పరిచయమైన ప్రపంచ ప్రఖ్యాత బాక్సర్‌ మైక్‌ టైసన్‌ పదేళ్లప్పటి నుంచే పావురాల్ని పెంచుకుంటున్నాడు. వందల సంఖ్యలో ఉన్న వాటితో పోటీలు నిర్వహించడమే కాదు... యాంకర్‌గా ‘యానిమల్‌ ప్లానెట్‌’ ఛానల్‌ కోసం పావురాలపైన ప్రత్యేక టీవీ కార్యక్రమాలూ చేస్తుంటాడు!

* మ్యాప్‌లని తొలిసారి ఉపయోగించింది గ్రీకులే.కాకపోతే, ప్రపంచం మొత్తానికీ తమ దేశమే కేంద్రమని భావించేవారు. ఆ తర్వాతి కాలంలో ప్రపంచంలో ఆసియా, ఐరోపా ఖండాలు మాత్రమే ఉన్నాయని భావించి ఆ రకంగానే మ్యాప్‌లు తయారుచేశారు!

* ఏనుగులూ, జింకలూ, గుర్రాలూ... చాలా శుభ్రత పాటిస్తాయి.అడవిలో ప్రత్యేకంగా బహిర్భూముల్ని ఏర్పాటు చేసుకుంటాయి. అక్కడ మాత్రమే విసర్జనకెళతాయి!

* జపాన్‌లో డైనింగ్‌ టేబుల్‌ వాడకం దాదాపు లేదనే చెప్పాలి. ఎంత సంపన్నులైనా సరే... అక్కడ చాపలపైన కూర్చునే భోజనం చేస్తారు!

* 1980 నుంచి ఓ నాలుగేళ్లపాటు క్యాడ్‌బరీస్‌ చాక్లెట్స్‌కి కావాల్సిన కోకో పంట మొత్తం కేరళలోనే పండించి ప్రపంచదేశాలకి ఎగుమతిచేశారు.

* మిగతా జంతువులతో పోలిస్తే పాములూ, మొసళ్లకి అరుగుదల చాలా తక్కువ. వారానికోసారే తింటాయవి. కొన్నిసార్లు వారం విడిచి వారం మాత్రమే ఆహారాన్ని తీసుకుంటాయి.

* భారతదేశంలో ఒకప్పుడు ఓ రాజు గొప్పతనం...యుద్ధంలో అతనికి తగిలిన గాయాల సంఖ్యని బట్టి ఉండేది. ఎంత ఎక్కువ గాయాలుంటే అంత గొప్పవీరుడన్నది లెక్క. సముద్రగుప్తుడు, అశోకుడు, శ్రీకృష్ణదేవరాయలు లాంటి వాళ్లు... వందకుపైగా గాయాల్ని దాల్చినవాళ్లట!