మిలమిల మెరిసే మంచు కొండల నడుమ అంతే అద్భుతంగా ఉండే కేదారనాథుడి ఆలయాన్ని చూస్తే చాలు... మనసంతా ప్రశాంతమైపోతుంది. అందుకే ఎన్ని ఇబ్బందులు ఎదురైనా భక్తులు అక్కడ శివయ్యను దర్శనం చేసుకుని వస్తుంటారు. ప్రకృతి రమణీయతకు పెట్టింది పేరైన ఆ ప్రాంతంలో ఉష్ణోగ్రత పడిపోయి మంచుగడ్డలు పేరుకుపోయే అక్టోబర్‌ లేదా నవంబర్‌ నెలల్లో గుడిని మూసి వేసి ఏప్రిల్‌- మేలో తెరుస్తారు. ఒక్కసారి గుడి మూసేశాక మళ్లీ అటువైపు ఎవరూ వెళ్లరు. అత్యంత ప్రమాదకర వాతావరణ పరిస్థితులు నెలకొనే కేథారనాథుడు కొలువైన ప్రాంతాన్ని ఇప్పుడు నిత్యం 30 మంది ఐటీబీపీ అధికారులు కాపు కాస్తున్నారు. ఎందుకంటే... మహారాష్ట్రకు చెందిన ఓ కుటుంబం కేదారనాథుడికి దాదాపు యాభై కేజీల బంగారాన్ని కానుకగా అందించింది. దాంతో ఆ గుడి అందాన్ని రెట్టింపు చేసేలా 550 గోల్డ్‌ షీట్స్‌ను చేయించి గర్భగుడిని అలంకరించారు. ఈ మధ్యనే ఆ పనులన్నీ పూర్తయ్యాయి. పైగా గుడి కూడా మూసి ఉండటంతో ఇండో టిబెటన్‌ బోర్డర్‌ పోలీసులు ఆలయ రక్షణ బాధ్యతల్ని చేపట్టారు.