యుగానికొక్కడు

‘కృషి ఉంటే మనుషులు రుషులౌతారు... మహా పురుషులౌతారు...’ అన్న మాటలకు నిలువెత్తు నిదర్శనం ఎన్టీఆర్‌.
ఓ మూరుమూల గ్రామం నుంచి సినిమాల్లోకి వచ్చి అకుంఠిత దీక్షా క్రమశిక్షణలతో ఆ రంగంలో శిఖరాగ్రానికి చేరిన అనితర సాధ్యుడు.
ఒకే సినిమాలో శ్రీకృష్ణుడు, అర్జునుడు, బృహన్నల, దుర్యోధనుడు, కీచకుడు వంటి పరస్పర విరుద్ధ స్వభావాలున్న ఐదు పాత్రలను అద్వితీయంగా నటించి మెప్పించిన కారణజన్ముడు.
రాజకీయాల్లో అడుగుపెట్టి, పార్టీని ప్రారంభించిన తొమ్మిది నెలల్లోనే ముఖ్యమంత్రిగా పట్టాభిషిక్తుడై నభూతో నభవిష్యతి అనిపించుకున్న కార్యదక్షుడు.
విధిని నమ్ముతూనే దానికి తన కృషిని జోడించి, ఎన్నో అసాధ్యాలను సుసాధ్యం చేసి, తెలుగువారికి జాతీయ అంతర్జాతీయ స్థాయుల్లో గుర్తింపునీ గౌరవాన్నీ తెచ్చిపెట్టిన తారకరాముడు నూటికో కోటికో కాదు- ఏ యుగానికో ఒకసారి మాత్రమే జన్మించే పూర్ణపురుషుడు.
(నేడు ఎన్టీఆర్‌ శతజయంతి)