కొండ చివర కోట... కోట చుట్టూ ఊరు!

ఎత్తయిన కొండ... దానిమీద పెద్ద కోట... ఆ కోటకు రక్షణగా- ఓ పట్టణం..! ‘కోటకు కాపలాగా సైనికులో, ఎత్తయిన గోడో ఉంటుంది కానీ పట్టణం ఉండటమేంటీ అనుకుంటున్నారా... మరదే ఇక్కడ గమ్మత్తు. ఇటలీలోని రోకా ఇంపీరియల్‌ అనే పట్టణాన్ని చూస్తే అలాగే అనిపిస్తుంది ఎవరికైనా. పర్వతాల నడుమ ఎత్తయిన కొండమీద ఓ పురాతన కోట ఉంటుంది. దానికి ఆనుకుని కొండ కింద భాగం వరకూ వందలాది ఇళ్లు బోలెడన్ని వరసల్లో కనిపిస్తాయి. దాదాపు నాలుగువేల జనాభాతో ఉండే ఈ ఊరు గుర్తింపు కూడా అదే. కాసింత సాహసాన్నీ, కూసింత ప్రకృతినీ ఇష్టపడేవారికి ఇదో చక్కటి సందర్శక ప్రాంతం. అందుకే అలాంటి పర్యటకులెందరో కొండపైకి ఎక్కిన ఈ ఊరును చూడ్డానికి బారులు కడుతుంటారు.