శ్రీరాముడి జననం నుంచి రావణ సంహారం వరకూ రామాయణగాథలో జరిగిన ఘట్టాల గురించి వినే ఉంటారుగా. మలేషియాలోని కౌలాలంపూర్‌కి వెళితే ఆ సన్నివేశాల్ని కళ్లకు కట్టినట్లుగా చూడొచ్చు. వేల ఏళ్లనాటి ప్రఖ్యాత బటు గుహల పక్కనే రామాయణ కేవ్‌ ఉంది. దీంట్లో బాలరాముడి నుంచి సీతారాముడి వరకూ ఎన్నెన్నో శిల్పాలుంటాయి. ఈ గుహ ముందు అడుగుపెట్టగానే యాభై అడుగుల ఎత్తుతో హనుమంతుడి విగ్రహం దర్శనమిస్తుంది. సున్నపురాయితో సహజసిద్ధంగా ఏర్పడిన విశాలమైన ఈ గుహలోపల- దేవాలయాలతో పాటూ వాల్మీకి రామాయణ కథ మొదలుపెట్టిన ఘట్టం నుంచి రామాయణ ఇతిహాసం ముగిసేవరకూ ఎన్నో సన్నివేశాలు ఉంటాయి. ఆయా పాత్రలన్నీ పెద్ద పెద్ద విగ్రహాలుగా ఎంతో అందంగా కనిపిస్తాయి. వందలాది విగ్రహాలతో కథ అంతా కళ్లకు కనిపిస్తుంది. గుహ లోపల రంగుల లైటింగ్‌ ప్రదర్శనల మధ్య ఉన్న ఈ శిల్పకథను చూడ్డానికి సందర్శకులు బారులు కడుతుంటారు.