ఆడవాళ్లలో చాలామందికి పాకశాస్త్రంలో చక్కని నైపుణ్యం ఉండొచ్చు, కానీ అదే చేతికి కాస్త చిత్రకళల్లోనూ ప్రావీణ్యం ఉంటే... ఆ వంటకాలు నోరూరిస్తూనే, కనువిందు చేసేయవూ. ఇదిగో ఇక్కడున్న పదార్థాలన్నీ అలా తయారైనవే. కాన్వాస్‌ లేదా వస్త్రాలపైన రకరకాల సంప్రదాయ పెయింటింగ్‌లు వేయడం అనేది అందరికీ తెలిసిందే. అదే విధంగా ఆహారపదార్థాల మీద కూరగాయ ముక్కలూ, కరివేపాకూ, కొత్తిమీర వంటివాటిని అలంకరించడమూ ఎప్పటినుంచో ఉన్నదే. అయితే ఈ రెండింటినీ జతచేసిన షైఫాలీతాంబే అనే కళాకారిణి... తాను చేసే వంటకాలనే కాన్వాస్‌లుగా మార్చి... అందమైన కళారూపాల్ని ఆవిష్కరించేస్తోంది. ముఖ్యంగా పనీర్‌ బటర్‌ మసాలా, దహీవడా, పాలక్‌ పనీర్‌... లాంటి వాటిమీద పనీర్‌, క్రీమ్‌, ఫుడ్‌కలర్స్‌, చిక్కని చింతపండు సాస్‌... ఇలా ఎన్నెన్నో పదార్థాల్ని వాడుతూ వర్లీ, మధుబనీ, గోంద్‌ శైలి చిత్రాలను ఎంతో అందంగా వేస్తోంది. నోటికి అందే రుచిలోనే కాదూ, కంటికి కనిపించే లుక్కులోనూ వెరైటీని కోరుకునేవారికి- ఇవి నచ్చకుండా ఉంటాయా... అందుకే సోషల్‌ మీడియాలో బోలెడన్ని ప్రశంసలూ అందుకుంటోందీ కళాకారిణి.