పిల్లలకు సంబంధించిన వస్తువు ఏదైనా కానీ... అది కచ్చితంగా వారిని ఆకట్టుకునేలా ఉండితీరాలంతే. అందుకే మరి, పుస్తకాల బ్యాగు నుంచి పెన్నుల బాక్సు వరకూ ప్రతిదీ పిల్లలు మెచ్చే మోడళ్లలోనే వస్తున్నాయి. ఇప్పుడు అదే తరహాలో ‘కిడ్స్‌ బుక్‌ షెల్ఫ్‌’ కూడా వచ్చేసింది. కారూ, జీపూ, చెట్టూ, ఇల్లూ... ఇలా చిన్నారులకిష్టమైన బొమ్మల రూపాల్లో ఈ పుస్తకాల అరలు అందుబాటులో ఉన్నాయి. గదిలో గోడ పక్కన పెట్టుకునేలా ఉండే ఈ అరల్లో పుస్తకాలూ, బొమ్మల్లాంటివి దేనికది సర్దుకునేలా విడివిడిగా బోలెడన్ని అరలు ఉంటాయి. అవసరమైతే అక్కడే కూర్చుని హోంవర్క్‌లాంటివి రాసుకునేలా ప్రత్యేకంగా కుర్చీలాంటి ఏర్పాటూ ఉంటుంది. ఇలా రెడీమేడ్‌గా దొరుకుతున్నవే కాకుండా కావాలంటే మీ బుజ్జాయిల గదికి సరిపోయే పుస్తకాల అల్మారానీ ప్రత్యేకంగా డిజైన్‌ చేయించుకోవచ్చు కూడా.