పండుకో పండుగ

కులమతాలకు అతీతంగా కేరళలోని కన్నూర్‌ జిల్లా కన్నాపురంలో ఓ పండుగ చేసుకుంటారు గ్రామస్థులు. అదే మామిడి పండుగ. పండు కోసం పండుగ ఏంటీ అనుకుంటున్నారా... కన్నాపురంలో షైజు మాఛాతీ అనే ప్రకృతి ప్రేమికుడు- తమ గ్రామంలోని మామిడి చెట్లు ఏయే జాతులకు చెందినవో తెలుసుకోవాలనుకున్నాడు. వ్యవసాయ శాఖలో పనిచేసే కొందరు మిత్రుల సాయంతో అక్కడున్న దాదాపు 400 చెట్లలో 200లకు పైనే మామిడి జాతులు ఉన్నట్టు గుర్తించాడు. దాంతో ఆ చెట్లను ‘నాటు మాంజోత్తిల్‌’ పేరుతో ఓ ఫేస్‌బుక్‌ పేజీని ఏర్పాటు చేసి- ఆ మామిడి రకాల గురించి పంచుకోవడం మొదలుపెట్టాడు షైజు. మరోవైపు గ్రామస్థులు కూడా తమ పెరట్లోని మామిడి రకాలకు అంటుకట్టి కొత్తవి సృష్టించడం ప్రారంభించారు.  తమ ఊరి మామిడి వైవిధ్యానికి గుర్తుగా ఏటా వేసవిలో- ఏడాదంతా కాయలు కాసే కుల నిర్యాన్‌, కొబ్బరికాయంత పెద్దగా ఉండే తేెంగా, కన్నాపురం, పులియన్‌, కుడక్కచ్చి, బప్పకాయ్‌, చెరి వంటి దాదాపు 200 రకాల మామిడి జాతులను ప్రదర్శించి పండుగ చేసుకోవడం మొదలుపెట్టారు. అలానే ఆ రాష్ట్ర జీవ వైవిధ్య బోర్డు కన్నాపురాన్ని ‘స్వదేశీ
మామిడి వారసత్వ ప్రాంతం’గానూ గుర్తించింది.