గర్భిణులకు గ్రంథాలయం

అమ్మాయి అమ్మ కావడమంటే పునర్జన్మనెత్తడమే. తొమ్మిది నెలల పాటు తన ఆరోగ్యాన్నేకాదు.. కడుపులోని బిడ్డ ఆరోగ్యాన్నీ భద్రంగా కాపాడుకోవాలి. ఈ క్రమంలో ఎన్నో సమస్యలూ, సందేహాలూ ఎదురవు తుంటాయి. కొంత మానసిక ఒత్తిడీ ఉంటుంది. అవన్నీ బిడ్డ ఆరోగ్యం మీద ప్రభావం చూపకుండా జాగ్రత్తగా ఉండాలి. అందుకే గర్భిణుల ఆరోగ్యం కోసం ప్రత్యేక శ్రద్ధ పెట్టారు తమిళనాడులోని తంజావూరు జిల్లా వైద్యాధికారులు. అక్కడి ప్రాథమిక ఆరోగ్యకేంద్రానికి వచ్చే గర్భిణుల కోసం ఓ గ్రంథాలయం ఏర్పాటు చేసి ఆరోగ్య చిట్కాలూ, మానసిక ఉల్లాసాన్ని పంచే కథలూ, స్ఫూర్తినిచ్చే జీవిత చర్రితలూ, హాస్య పుస్తకాలను అందుబాటులో ఉంచారు. దాదాపు మూడు వేల పుస్తకాలున్న ఆ గ్రంథాలయంలో గర్భిణులూ, బాలింతలూ చదువుకోవడానికి ప్రత్యేక ఏర్పాట్లు చేశారు. పుస్తకాలు చదవడం వల్ల సానుకూల ఆలోచనలు కలగడంతోపాటు, పుట్టబోయే బిడ్డకు జ్ఞాపకశక్తి బాగుంటుందని అధికారులు ఈ ఏర్పాటు చేశారు. దీనికి మంచి స్పందన వస్తుండటంతో అన్ని జిల్లాల్లోని ప్రాథమిక ఆరోగ్య కేంద్రాల్లోనూ ఇటువంటి గ్రంథాలయాలను ఏర్పాటు చేయడం మొదలుపెట్టారు అధికారులు.