కదిలే బడి

స్వచ్ఛంద సంస్థలు మురికివాడల పిల్లలకోసం బస్సులను తరగతి గదిగా మార్చేయడం మనకు తెలిసిందే. అయితే ధనవంతులకే అందుబాటులో ఉండే ఓ విద్యాసంస్థ పేద పిల్లలకోసం బస్‌ స్కూల్‌ను అందుబాటులోకి తేవడం ఇక్కడ విశేషం. సూరత్‌లోని విద్యాకుంజ్‌- విద్యాపీఠ్‌ గ్రూపు సంస్థకు ఆ ప్రాంతంలో మంచి పేరుంది. కానీ, అక్కడ ధనవంతులకే చదువు అందుబాటులో ఉంటుంది. అంతంత ఫీజులు కట్టలేని పేదలకు కూడా ఆ కార్పొరేట్‌ చదువులు అందుబాటులో ఉంచాలని స్కూలు యాజమాన్యం బస్సును హైటెక్‌ క్లాస్‌ రూమ్‌గా మార్చింది. బల్లలూ, ఎల్‌ఈడీ తెర, ఇంటర్నెట్‌, ఏసీ వసతులన్నీ ఏర్పాటు చేసి మురికివాడలకూ, వలస కార్మికులుండే ప్రాంతాలకూ పంపుతోంది. స్పోకెన్‌ ఇంగ్లిషుతోపాటు, ఆ పిల్లల స్థాయిని బట్టి పాఠాలు బోధిస్తున్నారు టీచర్లు. అందుకోసం దాదాపు పది బస్సులను బడిగా మార్చి...  పేదల పిల్లల్ని చదివిస్తోంది విద్యాకుంజ్‌ సంస్థ. అంతేకాదు పిల్లలు ఆసక్తిగా చదువు కోవడానికి రావాలనే ఉద్దేశంతో- బస్సుల్ని పలు ప్రాంతాలకు తీసుకెళు తుంటారు. అంటే కదిలే బస్సులోనే పిల్లలు పాఠాలు వింటారన్నమాట.