దండాలయ్య... ఉండ్రాళ్ళయ్యా!

గణనాధుడు జ్ఞానానికి ప్రతినిధి. వివేకానికి ప్రతీక. ఏనుగు తల నుంచి ఎలుక వాహనం దాకా... అంగాంగమూ అమూల్యమైన పాఠమే. గుమ్మడి కాయంత తల... గొప్పగా ఆలోచించమని చెబుతుంది. చాటంత చెవులు... శ్రద్ధగా వినమంటాయి. బుల్లినోరు... వీలైనంత తక్కువగా మాట్లాడమంటుంది. చిన్నికళ్లు... సూటిగా లక్ష్యానికే గురి పెట్టమంటాయి. బానపొట్ట... సుదీర్ఘ జీవితానుభవాల్ని తలపిస్తుంది. ఇక చిట్టెలుక... మనిషిలోని చంచల స్వభావానికి చిహ్నం. అహాల్నీ అత్యాశల్నీ ఎప్పుడూ నెత్తిన ఎక్కించుకోకూడదు. నిగ్రహశక్తితో వాటిని ఓడించాలి.  బతుకంటే... మంచిచెడులూ కష్టసుఖాలూ ఆనంద విషాదాలూ. అన్నింటినీ స్థితప్రజ్ఞతతో జీర్ణించుకోమని ప్రతీకాత్మకంగా బోధిస్తున్నాడు లంబోదరుడు. గణేష్‌ నవరాత్రుల్లో... రోజుకో మంచి గుణాన్ని అన్వయించుకున్నా చాలు. తొమ్మిదోరోజు మనలోని చెడునంతా నిమజ్జనం చేయవచ్చు.