రక్తాన్ని గడ్డకట్టించే నీడిల్‌ ప్యాచ్‌లు!

శరీరంలోకి నేరుగా మందును ఇంజెక్టు చేసేందుకు నొప్పి కలిగించని మైక్రో నీడిల్‌ ప్యాచ్‌లను తీసుకొచ్చారు. ఇంజెక్షన్‌కు బదులుగా ఈ ప్యాచ్‌ను అతికించడం వల్ల మందు నేరుగా చర్మకణాల్లోనుంచి రక్తంలో కలుస్తుంది. అయితే ఇప్పుడు అదే ప్యాచ్‌ను బ్యాండేజికి బదులుగా కూడా వాడొచ్చట. అదెలా అంటే- సన్నని నీడిల్స్‌తో ఉండే ఈ ప్యాచ్‌ను చర్మంమీద అతికించడంవల్ల అవి చర్మకణాల మధ్య ఉన్న ద్రవాల్లోకి చొచ్చుకువెళ్లి మందును విడుదల చేయడం ద్వారా గాయాల నుంచి రక్తం కారకుండా చేస్తాయని చెబుతున్నారు పెన్సిల్వేన్వియా స్టేట్‌ యూనివర్సిటీ నిపుణులు. ఇందుకోసం ఈ ప్యాచ్‌ సూదుల్ని జెలాటిన్‌ మెథాక్రిలాయల్‌, సిలికేట్‌ నానోప్లేట్‌లెట్స్‌తో తయారుచేశారట. దాంతో నీడిల్స్‌తో పాటుగా ఆ మందు గాయమైన చర్మకణాల్లోకి వెళ్లి రక్తాన్ని గడ్డకట్టిస్తుంది. కాబట్టి ఈ ప్యాచ్‌ను నేరుగా అతికిస్తే గాయం త్వరగా మానిపోతుంది. దీన్ని ఎలుకల్లో పరిశీలించినప్పుడు- పదకొండున్నర నిమిషాలకు గడ్డకట్టే రక్తం కాస్తా నిమిషంలోనే ఆగిందట. కాబట్టి సంప్రదాయ డ్రెస్సింగ్‌తో పోలిస్తే మైక్రోనీడిల్‌ ప్యాచ్‌లే బెటర్‌ అంటున్నారు.