తినకుండా ఎందుకు ఉండలేకపోతున్నారంటే..!

కొంతమంది ముందు పంచభక్ష్య పరమాన్నాలు పెట్టినా... వద్దు అనుకుంటే కనీసం వాటివైపు కూడా చూడరు. కానీ చాలామంది తినొద్దు అనుకుంటూనే తింటూ ఉంటారు. దీనికి కారణం ఏమిటాని పరిశోధించారు ఒసాకా మెట్రొపాలిటన్‌ విశ్వవిద్యాలయ నిపుణులు. ఎందుకంటే ప్రస్తుతం ప్రపంచదేశాలన్నీ ఎదుర్కొంటోన్న అతిపెద్ద సమస్య ఊబకాయం. దీనివల్ల హృద్రోగాలు, పక్షవాతం, క్యాన్సర్లు... ఇలా ఎన్నో సమస్యలు వస్తున్నాయి. దాంతో డైటీషియన్ల సలహా మేరకు చాలామంది ఆహారంలో మార్పుచేర్పులు చేసుకుంటూ బరువు తగ్గడానికి ప్రయత్నిస్తున్నారు. కానీ దానివల్ల పెద్దగా ఉపయోగం ఉండటం లేదు. కొద్దిరోజులపాటు నియమిత ఆహారాన్ని తిన్నా శరీరం కొన్నాళ్లకి మళ్లీ మొదటికే వస్తుంది. దీనికి కారణం మెదడులోని ఇన్ఫీరియర్‌ ఫ్రాంటల్‌ గైరస్‌లో జరిగే రసాయన చర్యలేనట. అదెలా అంటే- ఆహారానికి సంబంధించిన ఫొటోల్నిగానీ లేదా నేరుగా ఆహారాన్నిగానీ చూసినప్పుడు సంబంధిత వ్యక్తి ప్రమేయం లేకుండానే ఆ భాగం ఉత్తేజితమవుతున్నట్లు గమనించారు. అంతేకాదు, భావోద్వేగాలూ తినడానికి కారణమవుతున్నాయట. కాబట్టి ఆహారపుటలవాట్లను అర్థం చేసుకోవాలంటే సంకల్పిత, అసంకల్పిత... ఇలా రెండు దశల్లోనూ మెదడు పనితీరుని నిశితంగా గమనించాలని పేర్కొంటున్నారు. అయితే అసంకల్పితంగా జరిగే ఆ చర్యను నిరోధించాలంటే... మెదడుకు వద్దు వద్దు అన్న సంకేతాల్ని పదే పదే పంపించడం ద్వారా కొంతవరకూ నియంత్రణ సాధించవచ్చు అని చెప్పుకొస్తున్నారు.