ఎవరైనా సరే ఎక్కువకాలం జీవించాలనే కోరుకుంటారు. కానీ తరుముకొచ్చే వృద్ధాప్యాన్ని ఎవరూ ఆపలేరు. అందుకే వయసు మీదపడనీయని ఎంజైమ్‌ను గుర్తించి దాన్ని పెంపొందించగలిగితే ఇక జీవితానికి ఢోకా ఏముంటుంది అనుకున్నట్లున్నారు వర్జీనియా యూనివర్సిటీ పరిశీలకులు. ఆ దిశగా పరిశోధన చేపట్టారు. అందులో డిహైడ్రోజినేజ్‌ అనే పదార్థం శరీరంలో పేరుకున్న హానికర వ్యర్థాలను తొలగించి ఆయుష్షు పెరిగేలా చేస్తుందని గుర్తించారు. ఏడీహెచ్‌-1 అనే జన్యువును యాక్టివేట్‌ చేసినప్పుడు ఉత్పత్తి అయిన డిహైడ్రొజినేజ్‌ అనే ఎంజైమ్‌ హానికర గ్లిజరాల్‌, గ్లిజరాల్డిహైడ్‌... వంటి ఉత్పత్తుల్ని అడ్డుకున్నట్లు గుర్తించారు. నేలలోపల నివసించే వానపాముల్లో ఈ విషయాన్ని పరిశీలించినప్పుడు వాటి ఆయుష్షు సగానికి పైగా పెరిగిందట. అదీగాక, మితాహారంతో దీర్ఘకాలం జీవించవచ్చని పరిశీలనలూ చెబుతున్నాయి. దాంతో మనుషులతోపాటు ఎలుకలు, కోతులు, పందులకి మితాహారం ఇచ్చి, జన్యువుల్ని పరిశీలించినప్పుడు- అన్నింటిలోనూ ఏడీహెచ్‌-1 జన్యువు చురుగ్గా మారి, ఈ ఎంజైమ్‌ను ఉత్పత్తి చేసినట్లు గుర్తించారు. దీన్నిబట్టి ఆ జన్యువును కృత్రిమ పద్ధతుల్లోనైనా చురుకుగా మార్చగలిగితే వృద్ధాప్యాన్ని కొంతవరకూ అడ్డుకోవచ్చన్నది నిపుణుల అభిప్రాయం.