బావిలో కప్పలమైతే..

ఓ కప్ప బావిలో పుట్టి, అందులోనే పెరగటంతో లోకం గురించి తెలియక అదే ప్రపంచమనుకుంది. ఒకసారి వరదలకు సముద్రకప్ప వచ్చి బావిలో పడింది. దానితో మాట కలిపి ‘సముద్రమంటే ఎలా ఉంటుంది?’ అనడిగింది బావికప్ప. ‘అబ్బో చాలా పెద్దది’ బదులిచ్చిందది. బావికప్ప కాళ్లు బారచాపి ‘ఎంతుంటుందో చెప్పరాదా?’ అంది. ‘చాలా చాలా పెద్దది!’ అందది. బావికప్పకు అసహనం పెరిగి ‘నా బావికంటే పెద్దదైతే కాదుగా’ అంది గుర్రుగా. సముద్ర కప్ప ‘మిత్రమా! సముద్రాన్ని నీ బావితో పోల్చగలమా?’ అంది. బావికప్ప ‘అసంభవం! నా బావి కంటే మరేదీ పెద్దదిగా ఉండే అవకాశం లేదు. నువ్వు అన్నీ అబద్ధాలు చెబుతున్నావు’ అంటూ సముద్ర కప్పను కోపంగా బయటకు తరిమేసింది బావికప్ప.
రామకృష్ణ పరమహంస ఈ కథను చెబుతూ ‘చాలామంది ఇలా తమ తమ మత దురభిమానాలతో బావిలో కప్పల్లానే మగ్గిపోతున్నారు. సంకుచిత నమ్మకాలతో ఆధ్యాత్మిక పురోగతిని సాధించలేకపోతున్నారు. బావి దాటి బయటకు వెళ్తేనే కప్ప సముద్రాన్ని చూస్తుంది. ఇరుకు చట్రాల్లోంచి బయటకు వస్తేనే మనకు పరమసత్యం అవగతమవుతుంది’ అని హితపు పలికారు. 

చైతన్య