Bengaluru: అమానుషం.. నడిరోడ్డుపై బైక్‌తో వృద్ధుడిని ఈడ్చుకెళ్లి!

బెంగళూరు: కర్ణాటక రాజధాని బెంగళూరు(Bengaluru)లో అమానుష ఘటన చోటుచేసుకుంది. తన ద్విచక్ర వాహనంతో ఓ వృద్ధుడి కారును ఢీకొట్టడమే కాకుండా.. అక్కడినుంచి తప్పించుకునే యత్నంలో ఆయన్ను నడిరోడ్డుపై ఈడ్చుకెళ్లాడో యువకుడు. ఇటీవల దిల్లీలో ఓ యువతిని కారుతో ఢీకొట్టి, కొన్ని కిలోమీటర్ల మేర ఈడ్చుకెళ్లిన ఘటన చర్చనీయాంశమైన వేళ తాజా వ్యవహారం వెలుగు చూసింది. ఈ దారుణానికి సంబంధించిన వీడియో బయటకు వచ్చింది.

పోలీసుల వివరాల ప్రకారం..  సాహిల్ అనే యువకుడు తన ద్విచక్ర వాహనంతో ముత్తప్ప(71) కారును ఢీకొట్టాడు. ఈ క్రమంలోనే ఆయన తన కారులో నుంచి దిగగానే.. అతను పారిపోయేందుకు యత్నించాడు. దీంతో ముత్తప్ప.. వెంటనే అతని బైక్‌ వెనుక భాగాన్ని పట్టుకున్నారు. అయినప్పటికీ.. అతను మాత్రం వేగంగా బైక్‌ను ముందుకు పోనిచ్చాడు. వెనుకవైపు ఆయన అలాగే వేలాడుతున్నా.. బండిని ఆపకుండా రోడ్డుపై కొంత దూరం ఈడ్చుకెళ్లాడు. తోటి వాహనదారులు గమనించి వెంటనే అతన్ని అడ్డుకున్నారు. ఈ ఘటనలో వృద్ధుడి కాళ్లకు గాయాలయ్యాయి. నిందితుడిని అరెస్టు చేశామని, ఈ కేసులో తదుపరి విచారణ కొనసాగుతోందని పోలీసులు తెలిపారు.