Viral Video: కోడిపై ఆశతో.. చిరుత బోనులో చిక్కాడు!

లఖ్‌నవూ: ఉత్తర్‌ప్రదేశ్‌(Uttar Pradesh)లో అనూహ్య ఘటన చోటుచేసుకుంది. ఇక్కడి ఓ గ్రామంలో చిరుత(Leopard)ను బంధించేందుకు ఏర్పాటు చేసిన బోనులో ఓ మనిషి చిక్కుకుపోవడం గమనార్హం. బులంద్‌షెహర్(Bulandshahr) జిల్లాలోని బసెందువా గ్రామంలో కొన్నాళ్లుగా ఓ చిరుత పులి సంచరిస్తోంది. ఈ మేరకు సమాచారం అందుకున్న అటవీ శాఖ అధికారులు.. దానిని పట్టుకునేందుకు గ్రామ శివారులో ఓ బోను(Cage) ఏర్పాటు చేశారు. అందులో చిరుతకు ఎరగా ఓ కోడిపుంజును ఉంచారు.

అయితే, ఎవరు లేకుండా చూసి.. ఆ కోడిపుంజును కాజేయాలన్న ఆశతో ఓ వ్యక్తి లోపలికి ప్రవేశించాడు. అంతే.. ఒక్కసారిగా బోను గేటు మూసుకుపోవడంతో లోపలే చిక్కుకుపోయాడు. ఈ విషయాన్ని గుర్తించిన అటవీశాఖ అధికారులు.. అతన్ని బయటకు తీశారు. ప్రస్తుతం ఈ ఘటనకు సంబంధించిన వీడియో నెట్టింట వైరల్‌గా మారింది. ‘అయ్యో..!’ అని కొందరు నెటిజన్లు స్పందించగా.. కోడిపుంజును చేజిక్కించుకునే క్రమంలో తానే చిక్కుకుపోయాడంటూ మరికొందరు కామెంట్లు పెడుతున్నారు.