Viral video: మొసళ్లు VS బాలుడు.. ఎలా కాపాడారో చూడండి!

ఇంటర్నెట్‌ డెస్క్‌: అనుకోని పరిస్థితుల్లో ఒక్క మొసలి తారసపడితేనే.. వామ్మో అనుకుంటూ ప్రాణభయంతో పరుగులందుకుంటాం. అయితే, ప్రమాదవశాత్తూ నదిలో పడిపోయిన ఓ బాలుడిని కొన్ని మొసళ్లు వెంబడిస్తే? ప్రాణభయంతో అల్లాడుతున్న అతడి పరిస్థితి ఎలా ఉంటుందో అర్థం చేసుకోవచ్చు. ఆ మొసళ్ల నుంచి తప్పించుకుంటూ మునిగిపోతున్న ఆ బాలుడిని ఓ బృందం వీరోచితంగా కాపాడింది. ఇందుకు సంబంధించిన వీడియో ఒకటి ప్రస్తుతం  వైరలవుతోంది.

ఓ బాలుడు ప్రమాదవశాత్తూ చంబల్‌ నదిలో పడిపోయాడు. అయితే, ఓ మొసళ్ల గుంపు అతడిని వెంబడించింది. నీటిలో మునుగుతూ, తేలుతూ ఆ బాలుడు ప్రాణభయంతో అరుస్తుండటాన్ని.. పడవలో అటుగా వెళుతున్న కొందరు గుర్తించారు. వెంటనే వచ్చి అతడిని కాపాడారు. కాస్త ఆలస్యమైనా అతడు ఆ మొసళ్లకు ఆహారమైపోయేవాడు. ఈ ఘటనకు సంబంధించిన వీడియోను ఐఆర్‌ఎస్ అధికారి భగీరథ్‌ చౌదరి ట్వీట్‌ చేశారు. భయానక పరిస్థితుల్లో ఉన్న బాలుడిని రక్షించిన ఆ బృందాన్ని ప్రశంసించారు. కాగా ఈ వీడియో వైరల్‌గా మారింది.