Virat Kohli: నార్వే డ్యాన్సర్లతో విరాట్‌ అదిరిపోయే స్టెప్పులు

ఇంటర్నెట్‌ డెస్క్‌: బ్యాట్‌తో బౌండరీలు బాదడమే కాదు అదిరిపోయే స్టెప్పులూ వేయగలనని నిరూపిస్తున్నాడు స్టార్‌ బ్యాటర్‌ విరాట్‌కోహ్లి. నార్వేకు చెందిన అబ్బాయిల డాన్స్‌ గ్రూప్‌ ‘క్విక్‌స్టైల్‌’తో కలిసి డాన్స్‌ చేశాడు. బ్యాట్‌ పట్టుకుని అతడు చేసిన మూవ్స్‌ ప్రస్తుతం నెట్టింటిని హల్‌చల్‌ చేస్తున్నాయి. బోర్డర్ - గావస్కర్‌ ట్రోఫీ ముగిశాక అతడు ఈ విధంగా ఉత్సాహంగా గడపడం అభిమానుల్ని ఆకట్టుకుంటోంది.

వివరాల్లోకి వెళితే.. క్విక్‌స్టైల్‌(QS) బృందంలో ఓ వ్యక్తి క్రికెట్‌ బ్యాట్‌ని ఎత్తి ఏం చేయాలో ఆలోచిస్తుండగా వీడియో ప్రారంభమవుతుంది.  తెల్లరంగు టీషర్ట్‌, నల్ల ప్యాంటు ధరించి సీన్‌లోకి వస్తాడు విరాట్. ఆ సమయంలో మ్యూజిక్‌ వస్తుంది.  ఇష్క్‌, స్టిరియో నేషన్స్‌ పాటలకు బ్యాట్‌ పట్టుకుని మ్యూజిక్‌కు తగినట్టుగా డాన్స్‌ చేస్తాడు.  బృంద సభ్యులు అతడిని అనుసరిస్తూ స్టెప్పులేస్తారు. ఈ వీడియోను విరాట్‌ తన ఇన్‌స్టా ఖాతాలో పంచుకున్నాడు. వీడియోను పోస్ట్‌ చేసిన గంటలోనే 5.4 లక్షల లైకులు, 2 మిలియన్ల వీక్షణలు వచ్చాయి.  దీనిపై కోహ్లి భార్య, బాలీవుడ్‌ నటి అనుష్క శర్మ స్పందించి ఫయర్‌ ఎమోజీలను పోస్టు చేసింది. దీనిపై అభిమానులు మాత్రం భిన్నంగా స్పందిస్తున్నారు. ‘‘76వ సెంచరీ సంబరాలు బయటికి వచ్చాయని  ఓ యూజర్‌ కామెంట్ చేశాడు. కొందరేమో అతడి డాన్స్‌ మూవ్‌లకు ఫిదా అవుతున్నారు. ‘విరాట్‌ వారికి క్రికెట్‌ నేర్పిస్తే వారు అతడికి డాన్స్‌ నేర్పిస్తున్నారు. ఇదేదో బాగుంది కదూ?’ అంటూ  ఓ వ్యక్తి , బాలీవుడ్‌ నటుల కంటే గొప్పగా డాన్స్‌ చేశారని మరో వ్యక్తి కామెంట్లు చేశారు. భారత పర్యటనలో ఉన్న ఈ బృందం భారతీయ పాటలకు వేసిన స్టెప్పుల ద్వారా ప్రేక్షకులకు చేరువైంది. తను వెడ్స్‌ మను సినిమా నుంచి సద్దీ గల్లీ, బార్‌ బార్‌ దేఖో నుంచి కాలా చశమా పాటలకు వేసిన స్టెప్పులతో సామాజిక మాధ్యమాల్లో ఒక సంచలనంగా మారింది.