2019 మీదైన ట్వీట్‌!

శుభారంబానికి..

శుభారంబానికి... ఇంక రెండు రోజులే.. కొత్త ఏడాదిలో ప్రవేశించేందుకు ఉన్నవి... మరి, ఏం ప్లాన్‌ చేస్తున్నారు? ‘కేకు.. కిరాకు పార్టీ అన్నీ సిద్ధంగా ఉన్నాయ్‌గా!!’ అంటారా? ఆ ఒక్కరోజు సంబరం ఒకేగానీ.. మిగతా ఏడాది మాటేంటి? ఇప్పుడే కాస్త ఆలోచించండి! ఎందుకంటే..  ‘హ్యాపీ న్యూ ఇయర్‌’ అని ట్వీట్‌ చేస్తే సరిపోదు. మీరు చూడబోయే ‘న్యూ’ ఏంటో తెలుసుండాలి!

‘ఆర్యా.. లేవరా. వెళ్లి స్నానం చెయ్‌. స్వీటు తిందువు. తర్వాత గుడికి వెళ్లాలి. లే నాన్నా!’ అంటూ అమ్మ.... ‘ఏంటమ్మా పొదున్నే..! రాత్రే న్యూ ఇయర్‌ సెలబ్రేషన్స్‌ అయిపోయాయిగా!! ఇంకా ఏంటి? చావగొడతావ్‌. కాసేపాగి లేస్తా!’ అని దుప్పటి ముసుగేసుకున్నాడు ఆర్యా. ఆ పక్కనే హాలులో పేపర్‌ చదువుతూ ఆర్యా వాళ్ల నాన్న .. ‘ఎందుకు లేస్తాడు. నైట్‌ అంతా ఫ్రెండ్స్‌తో పార్టీలు, షికార్లు కదా. హ్యాపీ న్యూ ఇయర్‌ అంటూ అరిచి.. అరిచి.. ఊరు మొత్తానికి చెప్పుంటాడు. అంతే.. అక్కడితో న్యూ ఇయర్‌ అయిపోయింది. వాళ్లకి తెలిసిందంతే!’ అని ఓ నిట్టూర్పు.

‘ఎప్పుడూ పొద్దెక్కేదాకా నిద్రలేచేదానివి కాదు. ఈ రోజు ఏంట్రా చీకటితోనే లేచావు. డబుల్‌ఎక్స్‌ఎల్‌ సైజు ట్రాక్‌సూట్‌, బూట్లతో రెడీ అయిపోయావు. నేను చూస్తున్నది నిజమేనా?’ అంటూ పూజిత వాళ్ల అమ్మ ఆనందంతో మురిసిపోయింది. అప్పటికే వాకింగ్‌ ముగించుకుని వచ్చిన నాన్న.. ‘న్యూ ఇయర్‌ రిజల్యూషన్‌ అనుకుంటా!. ఎన్ని రోజులో చూద్దాం. మా అయితే ఓ వారం రోజులు. తర్వాత మామూలే. ఎన్నేళ్లు చూడలేదు..’ అని! ‘ఈసారి చూడండి. నేనేంటో చూపిస్తా!’ అంటూ వెళ్లింది పూజిత.

‘దేవుడికి దండం పెట్టుకుని ఏడాదంతా మంచి జరగాలని కోరుకో. నీకున్న కోపాన్ని తగ్గించుకుంటే మంచిది. ఇద్దరం కలగనేట్టు కలిసి బతాకలంటే నువ్వు మారాలి. లేకుంటే.. అంతే! నా మీదొట్టు.’ అంటూ అంజలీ కల్యాణ్‌ చేతిని తలపైన పెట్టుకుంది. ‘నా కోసం కాకపోయినా.. నీ కోసం మారతా. మన ప్రేమని గెలిపించుకోవడానికి మారతా’ అని కల్యాణ్‌ భరోసా ఇచ్చాడు.

- ఇలా సందర్భం ఎలాంటిదైనా.. బంధం ఏదైనా. లక్ష్యం ఎంత దూరమైనా? కన్న బిడ్డలు బాగుండాలని అమ్మకి ఆశ. వారికి బాధ్యత తెలియాలని నాన్న ధ్యాస. బంధం బలపడాలని ప్రియురాలి ప్రేమ.. ఇలా మనందరిలోనూ మార్పుని కోరుకునే వాళ్లు చుట్టూ ఉంటారు. వెతకండి. ఇల్లు... కాలేజీ.. ఆఫీస్‌.. ఇలా అన్ని చోట్లా. మిమ్మల్ని మిస్టర్‌ ఫర్‌ఫెక్ట్‌లా చూడాలనుకుంటారు వాళ్లు. వాళ్ల కోసం కాకపోయినా.. మీ కోసం మీరు! మీతో మీరు ‘హ్యాపీ న్యూ ఇయర్‌’ చెప్పుకొని చూడండి. ‘కొత్త’గా మిమ్మల్ని మీరే సంస్కరించుకోండి. అప్పుడు.. సెల్ఫీల చావులుండవు.. పేరెంట్స్‌కి పూడ్చలేని బాధ ఉండదు.. ప్రేమలో ఓడిన చావులుండవు.. ఎక్స్‌ లవర్‌ అని చెప్పుకొనే ఇబ్బందులుండవు..

ఏమంటారు? కొత్త ఏడాదిలో కొత్తగా పుట్టే ప్రయత్నం చేద్దాం. అందుకు ఏం చేయాలి? మీకు మీరే ఓ ట్వీట్‌ చేసుకోండి. అదో లైఫ్‌ ట్వీట్‌ అవ్వాలి!! చదివిన ప్రతిసారీ ప్రేరణ పుట్టాలి. ప్రేరేపించాలి.

సవాల్‌లా స్వీకరించండి
వందల పేజీలున్న పుస్తకంలో సారాన్ని వెతుకుతాం.. వందల వాక్యాలున్న వ్యాసంలో విషయాన్ని గ్రహిస్తాం.. పదుల సంఖ్యలో ఫార్ములాల్ని అప్లై చేసి మ్యాథ్స్‌లో ఎక్స్‌ విలువని వెలికితీస్తాం.
లెక్కకు మిక్కిలి సవాళ్లు ఎదురయ్యే జీవితం నుంచి ఏం నేర్చుకోకపోతే ఎలా? దోస్త్‌ మేరా దోస్త్‌ అంటారు.. వారం తిరిగేలోపు కటీఫ్‌ చెప్పేస్తారు. పదహారు ప్రాయంలో నాకొక గార్ల్‌ఫ్రెండ్‌ కావాలంటారు.. పదిరోజులకే బ్రేకప్‌ అనేస్తారు.. వచ్చే సెమ్‌లో టాప్‌ చేయాలనుకుంటారు.. ఎగ్జామ్‌ ముందు రోజే సినిమాకెళ్తారు.. చాలా ఎక్స్‌ప్రెసివ్‌ అంటారు.. మరుక్షణమే ముఖం మాడ్చుకుని కూర్చుంటారు.. అప్పుడే సూపర్‌ అని ట్వీట్‌ చేస్తారు.. కొద్ది నిమిషాలకే ఫీలింగ్‌ బోర్‌ అంటూ షేర్‌ చేస్తారు.. ఎన్నాళ్లు... ఎన్నేళ్లిలా? ఈ తరహా లైఫ్‌స్టైల్‌కి చెక్‌ పెట్టాల్సిందే. ఎందుకంటే.. ఎక్స్‌ వాల్యూని వెతికే క్రమంలో మీ విలువని తెలుసుకోకపోవడం. మీకు మీరే అర్థంకాకపోవడం.. మీ గురించి మీరు తెలుసుకున్నాకే ముందున్న ప్రపంచాన్ని అంచనా వేయగలరు!! ఆలోచించాల్సిన టైమ్‌ వచ్చింది. అందుకే ఈ లైఫ్‌ ట్వీట్స్‌. ప్రపంచంతో పంచుకోవడానికి కాదు.. మీతో మీరు షేర్‌ చేసుకోవడానికి.. వాటిపై మీరే కామెంట్‌ చేయడానికి!! పదహారు ప్రాయంలో.. పడిలేచే వయసులో వీటి అవసరం ఎంతో ఉంది!! మీరున్న మానసిక స్థితికి సరిపడే వాటిని ఎంచుకోండి. లేదంటే.. మీకు మీరుగానే ఓ ట్వీట్‌ని రాసుకోండి. ల్యాపీ డెస్క్‌టాప్‌పైనో.. ఫోన్‌ వాల్‌పేపర్‌గానో పెట్టుకోండి. నిత్యం మీకు కనిపించేలా!!