బద్ధకం.. బద్దలు కొడదాం

జరా సోచో

చదవాలంటే బద్ధకం. పని చేయాలంటే బద్ధకం. ఇది వ్యక్తిగత ఎదుగుదలకు బద్ధశత్రువని తెలిసినా యూత్‌లో చాలామంది దీన్ని వదిలించుకోలేపోతూనే ఉంటారు. జోష్‌కి చిరునామాగా ఉండే కుర్రకారు ఈ పదాన్ని డిక్షనరీ నుంచి ఎలా చెరిపేయాలి? ఇవిగోండి కొన్ని టిప్స్‌.

జర సోచోడెడ్‌లైన్‌: చూద్దాంలే.. చేద్దాంలే.. చాలామందిది ఇదే తీరు. దాన్ని పక్కన పెట్టండి. రొటీన్‌కి భిన్నంగా ప్రతిదానికీ ఓ డెడ్‌లైన్‌ పెట్టుకొని పని చేయండి. ఫలానా టైమ్‌కి చేసి తీరాల్సిందే అనుకోండి. కచ్చితంగా మెరుగవుతారు.
చిన్న లక్ష్యాలు: ఐఏఎస్‌ అయిపోవాలి.. కంపెనీని కోట్ల టర్నోవర్‌కి తీర్చిదిద్దాలి అనే పెద్ద లక్ష్యాలుండటం తప్పేం కాదు. వాటిని చిన్నచిన్న టార్గెట్లుగా విభజించుకోవాలి. ఈ సమయంలోగా ఇన్ని పుస్తకాలు చదివేయడం, ఫలానా ఏడాదికి ఇంత టర్నోవర్‌ సాధించడం.. ఇలా.

స్ఫూర్తిదాతలు: ఏ పనికైనా స్ఫూర్తినిచ్చే వ్యక్తిని తలచుకుంటే మంచిది. మన పక్క సీట్లో సూపర్‌గా పని చేసే సహోద్యోగి, క్యాంపస్‌లో మంచి జాబ్‌ కొట్టిన సీనియర్‌.. వీళ్లనే అనుక్షణం తలచుకుంటే బద్ధకం పరారవుతుంది.
బాధ అనుభవించాలి: దెబ్బ తగిలితే నొప్పిని అనుభవిస్తాం. బద్ధకంతో ఏమేం కోల్పోతామో ఆ బాధని సైతం గుర్తించాలి. చేతగానితనంతో ఏమేం నష్టపోతున్నామో మననం చేసుకోవాలి. కాగితంపై రాసుకోవాలి. మార్పు రావడం ఖాయం.

బహుమతి ఇచ్చుకుందాం: ఆరోజు పని సమయంలోగా ముగిస్తే ఓ ట్రీట్‌.. చిన్న టార్గెట్‌ పూర్తి చేస్తే  ఓ కొత్త చొక్కా.. చివరి లక్ష్యం చేరితే నచ్చిన సెల్‌ఫోన్‌.. ఇలా మనకు మనమే బహుమతులు ఇచ్చుకుంటే తప్పేం లేదు. మరింత ఉత్సాహంగా పని చేయడానికి మనకు మనమే ప్రేరణ అవుతాము.