పెళ్లి ముఖ్యం.. పిల్లలే కష్టం!

...అంటున్నారు మన యూత్‌. అదేంటి పెళ్లయ్యాక ఎలాగూ పిల్లలు తప్పదుగా అంటారా! కానీ వాళ్ల కారణాలు, కష్టాలు వాళ్లకున్నాయి బాస్‌! ‘టుడే’ మ్యాగజైన్‌ ‘యూత్‌ సర్వే 2021’ పేరుతో నిర్వహించిన అధ్యయనంలో 18-34 ఏళ్ల పడుచుప్రాయులు ఏకరువు పెట్టిన ఇంకొన్ని సంగతులు.

* ‘పెళ్లి జీవితంలో అత్యంత ముఖ్యమైన ఘట్టం, చేసుకొని తీరాల్సిందే’ అని 52 శాతం కుర్రకారు అభిప్రాయ పడితే.. చేసుకున్నా, చేసుకోకపోయినా ఫర్వాలేదు అన్నవాళ్లు 27 శాతం. ‘అబ్బే.. మాకు పెళ్లి అక్కర్లేదు. సహజీవనమే చేస్తాం’ అని తెగేసి చెప్పినవాళ్లు 21 శాతం.

* పిల్లల విషయానికొస్తే.. 54శాతం అమ్మాయిలు, అబ్బాయిలు సంతానం కోరుకుంటుంటే.. 18శాతం ఎటూ తేల్చుకోలేకపోయారు. 14 శాతం మంది ఎవరినైనా పెంచుకుంటాం అంటే.. ఇంకో 14 శాతం అసలు పిల్లల్నే కనం అన్నారు.

* పెళ్లి, పిల్లలు రెండూ ముఖ్యమే అన్నవాళ్లు 38శాతం మాత్రమే.

* పెరుగుతున్న జీవన వ్యయాలు, భరించలేని ఖర్చులు, పిల్లల్ని భారంగా భావించడం, చిన్నారులతో గడపడానికి సమయం లేదనుకోవడం.. ఇవన్నీ సంతానం వద్దనుకునే యూత్‌ చెప్పిన సాకులు.