గుర్తొస్తే.. ఇప్పటికీ ఏడుపాగదు!

కశ్మీర్‌ ఫైల్స్‌.. సినిమా.. ఇప్పుడో సంచలనం. వివాదాల నిప్పు రాజేస్తున్ననేపథ్యం. ఆ సంగతి అలా ఉంచితే అందులోని నటీనటుల నటనకి చప్పట్లు కొట్టని ప్రేక్షకుడు లేడు. అందులో సీనియర్లకు ఏమాత్రం తగ్గకుండా మెప్పించాడు దర్శన్‌కుమార్‌. అతడి వ్యక్తిగతం,  సినీ ప్రయాణం..

నేపథ్యం: పూర్తిపేరు దర్శన్‌ ఘన్‌దాస్‌ కుమార్‌. దిల్లీ కుర్రాడు. 2013లో సల్మాన్‌ఖాన్‌ సినిమా ....లో చిన్న పాత్రతో తెరంగేట్రం చేశాడు. ‘మేరీకోం’లో ముఖ్యపాత్ర పోషించి వెలుగులోకి వచ్చాడు.

గాడ్‌ఫాదర్‌: నసీరుద్దీన్‌ షాని గురువుగా భావిస్తాడు. ‘మోట్లే ప్రొడక్షన్‌’లో శిక్షణ తీసుకుంటున్నప్పుడు పరిచయం.

కలల లోకంలోకి: దిగువ మధ్యతరగతి కుటుంబం. చిన్నప్పట్నుంచే సినిమాలంటే ప్రాణం. టీనేజీలోనే సొంతంగా వీడియోలు, షార్ట్‌ఫిల్మ్‌లు తీశాడు. కలల్ని వెతుక్కుంటూ కౌమారంలోనే ముంబయిలో వాలిపోయాడు.

గుర్తింపు: ఎన్‌హెచ్‌ 10, తూఫాన్‌, ఫ్యామిలీమ్యాన్‌ వెబ్‌సిరీస్‌లు.

ఇన్‌స్టాగ్రామ్‌ ఫాలోయర్లు: 7 లక్షలు

మెచ్చే నటీనటులు: హృతిక్‌ రోషన్‌, కియారా అద్వానీ. గాయకుడు అరిజిత్‌ సింగ్‌.

తప్పని దినచర్య: జిమ్‌కెళ్లి కార్డియో, బైసెప్స్‌ వ్యాయమాలు చేయడం.

ఇష్టపడేది: బైక్‌ రైడింగ్‌. ఒంటరిగా హిల్‌స్టేషన్లకు వెళ్తుంటాడు. మూగజీవాలంటే ప్రేమ. ఇన్‌స్టాలో ఫాలోయర్లకు ఫ్యాషన్‌ సలహాలిస్తాడు.

శిక్షణ: నటుడిగా రాటుదేలేందుకు నీనాగుప్తా నడిపిస్తున్న ‘సహెజ్‌ థియేటర్‌ ఆర్ట్స్‌’లో శిక్షణ పొందాడు. కొన్నాళ్లు మోడలింగ్‌ చేసి సినిమా బాట పట్టాడు.

పాత్రల కోసం: పాత్రల కోసం తపించే రకం. సరబ్‌జిత్‌ పాత్ర కోసం ఉర్దూ నేర్చుకున్నాడు. తూఫాన్‌ కోసం మూడునెలలు బాక్సర్‌ అయ్యాడు. ఫ్యామిలీమ్యాన్‌ కోసం పాకిస్థాన్‌ చరిత్ర చదివాడు. కశ్మీర్‌ ఫైల్స్‌ చేసేముందు పదుల సంఖ్యలో కశ్మీరీ పండిట్‌ కుటుంబాలతో సావాసం చేశాడు.

మర్చిపోలేనిది: కశ్మీర్‌ ఫైల్స్‌లో కృష్ణ పండిట్‌ పాత్ర రెండువారాలు వెంటాడిందట. ఆ పాత్ర, నేపథ్యం గుర్తొచ్చినప్పుడల్లా అప్రయత్నంగా కళ్లలో నీళ్లు తిరుగుతూ డిప్రెషన్‌లోకి వెళ్లిపోయేవాడట.