బైకంటే.. ప్రేమంట

బండిని గాళ్‌ఫ్రెండ్‌లా భావించే కుర్రాళ్లుంటారు. బెస్టీలా చూసే అబ్బాయిలూ కనిపిస్తారు. ‘ద్విచక్రవాహనంతో యువతకి ఎందుకింత అనుబంధం?’ అని ప్రముఖ ఆటోమొబైల్‌ కంపెనీ దేశంలోని ఆరు నగరాల్లో అధ్యయనం చేసింది. వాళ్లేం చెప్పారంటే.. 

వేగం: మోటార్‌సైకిళ్లలో కుర్రకారుని అత్యధికంగా ఆకట్టుకునేది వేగం. కళ్లు మూసి తెరిచేలోగా వంద కిలోమీటర్ల వేగం అందుకోవడం వాళ్లకి కావాలి. గాల్లో తేలిపోతుంటే.. వాళ్లు పొందే అనుభూతి మరెక్కడా దొరకదట. అందుకే వేగం, మేటి పికప్‌ ఉన్నవాటినే ఇష్టపడుతున్నారు.

స్టైల్‌: బడ్జెట్‌ చిన్నదైనా, పెద్దదైనా.. కుర్రాళ్లు ఉన్నంతలో ఆకర్షణీయంగా ఉండే బైక్‌ని కోరుకుంటున్నారట. రూపం నచ్చితే మైలేజీ, ధర విషయంలోనూ రాజీ పడతాం అంటున్నారు. 

శబ్దం: ఆశ్చర్యంగా ఉన్నా ఇది నిజం. బండి ఇంజిన్, ఎగ్జాస్ట్‌ నుంచి వెలువరించే శబ్దం నచ్చితే చాలు.. దాన్ని కొనుక్కునే యూత్‌కి లెక్కేలేదు. రాయల్‌ ఎన్‌ఫీల్డ్‌ ‘బుల్లెట్‌’, బజాజ్‌ ‘పల్సర్‌’ మోడళ్లు ఇలా పల్స్‌ పట్టినవేనట. 

పోజు: తమ యాటిట్యూడ్‌ చూపించుకోవడానికి అనువుగా ఉండేది బైక్‌ అనే నమ్ముతున్నారు చాలామంది. రివ్వున దూసుకెళ్తూ పోజు కొట్టడానికి, రోడ్డుపై ‘అన్నీ’ కవర్‌ చేయడానికి బెస్టీలను వెనకేసుకొని తిరగడానికి ద్విచక్రవాహనం కారుకన్నా అనుకూలమని వారి అభిప్రాయం.