బయోలు.. అభయాలు!

ముఖం చూసి మనసులో ఏముందో కనిపెట్టేయడం కష్టం. కానీ ఇన్‌స్టాగ్రామ్‌ ‘బయో’ చూసి వాళ్ల మనస్తత్వం ఏంటో ఇట్టే పట్టేయొచ్చు అంటారు. మరి మనకిష్టమైన కొందరి తారల మనసుల్లో, బయోల్లో ఏముంది?

‘మనస్‌ ఏకం.. వచస్‌ ఏకం.. కర్మణ్యేకం మహాత్మనామ్‌’  - విజయ్‌ దేవరకొండ

సోది లేకుండా చెప్పాలంటే.. మనసు చెప్పింది విను.. కష్టపడి పని చెయ్‌.. ఫలితం దానంతట అదే వస్తుంది అని. తను ఎవరి అండదండలు లేకుండా కష్టపడి ఒక స్టార్‌ హోదా అందుకున్నాడుగా మరి.

‘త్రో హ్యాపీనెస్‌ ఎరౌండ్‌ లైక్‌ ఏ కాన్ఫెటీ’  - రకుల్‌ప్రీత్‌ సింగ్‌

రంగురంగుల కాగితాల్లా నీ చుట్టూ సంతోషాల్ని వెదజల్లుమంటోంది రకుల్‌ప్రీత్‌. మనం సంతోషంగా ఉంటే, చుట్టుపక్కలా ఉండేలా చూస్తే.. అంతకుమించిన సానుకూల దృక్పథం ఏముంటుంది.

‘మూవీస్‌ సూపర్‌ కార్స్‌ టెక్నో’    - నాగచైతన్య

సూటిగా సుత్తి లేకుండా నాకు సినిమాలు, సూపర్‌ కార్లు, టెక్నాలజీ ఇష్టమని చెప్పేశాడు చై. తను ఓ రేసర్‌ కూడా అని దీని ద్వారా చాలామందికి తెలిసింది.

‘అట్లాస్‌ హ్యాండ్స్‌’  - పూజా హెగ్డే

ఈ బయోని అర్థం చేసుకోవడం కష్టం అనుకుంటే.. ఈ బుట్టబొమ్మకి అత్యంత ఇష్టమైన సాంగ్‌ ఏంటో తెలిస్తే జవాబు తేలిగ్గానే తెలిసిపోతుంది. అదే.. బెంజమిన్‌ ఫ్రాన్సిస్‌ పాడిన ‘అట్లాస్‌ హ్యాండ్స్‌’.

‘థింగ్స్‌ ఆర్‌ ఆల్వేస్‌ ఇంపాజిబుల్‌, రైట్‌ ఆప్‌ అంటిల్‌ దే ఆర్‌ నాట్‌’  - సమంతా

ఒక పని పూర్తయ్యేవరకు, ఒక విజయం సాధించే వరకు అవి ఎప్పటికీ కష్టసాధ్యంగానే అనిపిస్తాయి అని. కష్టపడితే సాధ్యం కాని పనేదీ లేదని పరోక్షంగా చెబుతోంది సామ్‌.

‘బీ ఏ మిరకిల్‌’ - రష్మికా మందన్న

నలుగురిలో ఒకరిలా కాకుండా నువ్వో అద్భుతంలా ఉండాలి అన్నది ఈ అమ్మడి మాట. మనపై మనం నమ్మకం పెట్టుకొని, బాగా కష్టపడితే ఈ అద్భుతం సాధ్యమేనని పరోక్షంగా చెబుతుందన్నమాట.