కాలేజీకైనా.. కార్యాలయానికైనా

ఒంటిపై మంచి దుస్తులు ఉంటే ఆటోమేటిగ్గా ఆత్మవిశ్వాసం పెరుగుతుంది. స్టైలిష్‌గా కనిపిస్తుంటే ముఖంలో సంతోషం నిలుస్తుంది. అందుకే మరి కుర్రకారు షోకిల్లారాయుళ్లలా మారిపోతుంటారు. ఇందులోనూ కొన్ని చిట్కాలు పాటిస్తే సొగసులకు నిండుదనం వస్తుందంటున్నారు ఫ్యాషన్‌ గురూలు. అవేంటంటే.. 

* షర్టు, ప్యాంటు, జాకెట్, బ్లేజర్‌.. ఏది వేసినా ఒంటికి సరిపోయేలా ఉండాలి. మరీ బిగుతుగా, మరీ వదులుగా.. పొట్టిగా, పొడుగ్గా ఉంటే ఎంత మంచి డిజైన్, ఫ్యాబ్రిక్, ఖరీదైన డ్రెస్‌ అయినా చూడ్డానికి బాగుండదు.

* కాలేజీ కుర్రాడు పూల చొక్కాలు, బులుగు రంగులు ధరిస్తే ఫర్వాలేదు. కార్పొరేట్‌ ఉద్యోగీ అలాంటివే వేస్తానంటే కుదరదు. ఒంటికి తగ్గవే కాదు.. వృత్తికి తగ్గవీ ఎంచుకోవాలి.

* గీతలు, పూల డిజైన్లు, ప్యాటర్న్‌లు, చెక్స్‌.. ఇవి అందరికీ నప్పవు. కానీ ఒకే రంగుతో ఉండే ప్లెయిన్‌ చొక్కాలు కాలేజీ కుర్రాళ్లు, యువ ఉద్యోగులు అందరికీ బాగుంటాయి. హుందాతనం, స్టైల్‌ రెండింటినీ ఒడిసిపట్టొచ్చు.

* పార్టీలు, కాలేజీల్లో మెరుపుల డిజైన్లు, నినాదాలున్న టీషర్టులు ఓకే. ఆఫీసుకెళ్లే వాళ్లు, మ్యాన్లీగా కనిపించాలి అనుకునేవాళ్లకి పోలో టీషర్టులు, కాలర్‌ టీ షర్టులు అనుకూలంగా ఉంటాయి.

* వేసుకునే దుస్తుల నాణ్యత బాగుండాలి అనుకుంటే.. రంగు వెలిసిపోకుండా అత్యధిక కాలం మన్నిక కావాలంటే వార్డ్‌రోబ్‌లో ఎక్కువ ఔట్‌ఫిట్‌లు ఉండాలని కోరుకునే బదులు. నాణ్యమైన ఫ్యాబ్రిక్‌వి ఎంచుకోవాలి.

* స్లిమ్‌ ఫిట్‌ ప్యాంట్లు.. టీనేజీ అబ్బాయిల నుంచి అంకుల్స్‌ దాకా అందరికీ సరిపోతాయి. సౌకర్యంగా ఉంటాయి. క్యాజువల్‌ లుక్‌ కావాలనుకుంటే లేత రంగు చొక్కాలపై ముదురు రంగు డెనిమ్‌లు వేస్తే జోడీ బాగుంటుంది.

* ఒంటిపై ధరించే దుస్తులకు అన్ని నిబంధనలూ పాటించి పాదాలను పట్టించుకోకపోతే మీ స్టైల్‌ ప్రక్రియ పూర్తవదు. కాలేజీ కుర్రాళ్లు చినోస్, స్నీకర్లు, స్పోర్ట్స్‌ షూలు.. యువోద్యోగులు ఫార్మల్, బ్రోగ్, డెర్బీలు.. వేస్తే స్టైల్‌కి నిండుదనం వస్తుంది.

 - షణ్మిత గాయత్రి, ఫ్యాషన్‌ డిజైనర్‌