యానిమేషన్‌లో ఆంగ్లం శి‘వాహ్‌’

ఆంగ్లం... చాలా మంది సమస్య. ఆంగ్లమాధ్యమంలో చదివిన వారికి సైతం ఈ భాషలో మాట్లాడటం కష్టమైపోతున్న సమయం. అలాంటిది ఒక తెలుగు మాధ్యమంలో చదివిన కుర్రాడు ఆంగ్లంలో మాట్లాడటం ఎలాగో నేర్పే యానిమేషన్‌ పాఠాలు రూపొందించాడు. యూట్యూబ్‌ నుంచి ప్రతి నెలా రూ.30,000 వరకూ పారితోషికం అందుకుంటున్నాడు. ఇంతకీ ఆ కుర్రాడెవరంటే..?

ఆంగ్లం నేర్చుకోవడానికి తను ఇంజినీరింగ్‌లో ఎదుర్కొన్న సమస్యతోనే చాలా మంది బాధపడుతున్నారని గుర్తించాడు గాడేకర్‌ శివ. నిర్మల్‌ జిల్లా భైంసా మండలం లింగ-1 గ్రామంలో పాఠశాల నుంచి తెలుగు మీడియంలోనే చదివాడు. ఇంజినీరింగ్‌(సివిల్‌)లోకి వచ్చే సరికే అంతా ఆంగ్లమే. ఏం చేయాలో తెలియని పరిస్థితి శివది. ఎక్కడ? ఎలా నేర్చుకోవాలో దిక్కుతోచని స్థితి. తనలాగే ఆంగ్లమాధ్యమం నుంచి వచ్చిన యువత సైతం ప్రాజెక్టు వర్క్‌లు, ప్రజెంటేషన్లు ఇచ్చేటప్పుడు ఆంగ్లభాషతో ఇబ్బంది పడుతున్నారు. దీనికి ఏదైనా పరిష్కారం కనుక్కోవాలని ఆలోచించాడు. గూగుల్‌, యూట్యూబ్‌లను ఆయుధాలుగా మలుచుకున్నాడు. రాత్రింబవళ్లు కష్టపడ్డాడు. ఆంగ్ల వ్యాకరణం, భాషా నైపుణ్యంపై పాఠాలను కొత్త పద్ధతిలో చెప్పాలని ఆలోచించాడు. యానిమేషన్‌, బొమ్మలతో చెబితే చక్కగా అర్థం చేసుకోవచ్చని నిర్ణయానికి వచ్చాడు. ఒకే సారి ఆంగ్ల, హిందీ, తెలుగు, ఉర్దూ మాధ్యమాల్లో ఈ పాఠాలను తయారు చేసి యూట్యూబ్‌లో అప్‌లోడ్‌ చేశాడు. వీటికి ఎంతో ఆదరణ లభిస్తోంది. సంవత్సర కాలంలోనే 1.20లక్షల మంది సబ్‌స్క్రైబర్‌లు 50లక్షల సార్లు వీక్షించారు. ఇంత మందికి ఉపయోగపడే విధంగా వీడియోలను పొందుపర్చిన శివ ప్రతిభను గుర్తించిన యూట్యూబ్‌ ఇటీవల సిల్వర్‌ ప్లే బటన్‌(వెండి పలక) పంపించింది. అంతేకాదు వాటిపై వివిధ ప్రచార సంస్థలు యాడ్స్‌ ప్రసారం చేస్తున్నాయి. దీంతో గూగుల్‌-యూట్యూబ్‌ సంస్థ ప్రతి నెల ఈ యువ ఇంజినీరుకు రూ.30వేల పారితోషికాన్ని ఇస్తున్నాయి. శివ ఈ వీడియోలు చేస్తూ... భైంసా పట్టణంలో ఓ ఆర్కిటెక్చర్‌ వద్ద ఉద్యోగమూ చేస్తున్నాడు.