ప్రతిరోజూ సవాలే

సమస్యలపై స్పందించడం.. స్ఫూర్తివీరులకు సాయం చేయడం.. మరుగునపడ్డ విజేతలకు సలాం కొట్టడం.. పారిశ్రామికవేత్త, మహీంద్రా అండ్‌ మహీంద్రా అధినేత ఆనంద్‌ మహీంద్రా నైజం. సామాజిక మాధ్యమాల్లో ఆయనను అనుసరించేవారికి ఈ విషయం బాగా తెలుసు. అలాగే పలు సందర్భాల్లో ఆయన యువతకు అనుభవ పాఠాలు అనదగ్గ మాటలు చెప్పారు. అందులోంచి కొన్ని...

* నాయకుడి చూపు ఎప్పుడూ ముందువైపే ఉంటుంది. భవిష్యత్తుపై సానుకూలంగా ఉంటాడు. గతాన్ని పదేపదే తలచుకోవడం, చుట్టుపక్కల చూడటం ఉండదు.

*  ప్రతిరోజునీ మనం ఓ సవాలుగానే చూడాలి. ఈరోజు కొత్తగా చేసిందేంటని ఆలోచించాలి. ఆచరించాలి. అప్పుడే ఆ రోజుకి సార్థకత.

*  సంప్రదాయ పద్ధతులు పాటిస్తుంటే.. మేక్‌ ఇన్‌ ఇండియా లక్ష్యం చేరలేం. ఒక్క ఉదుటున దూకుడు పెంచాలి. పోటీదారుల కన్నా నాలుగుగడుగులు ముందుండాలి.

*  నా దృష్టిలో విద్య ఒక్కటే మెరుగైన సమాజాన్ని తయారు చేస్తుంది. అక్షరాస్యత అధికంగా ఉన్నచోటే ఉదారవాద సమాజం తయారవుతుంది.

*  మన ఉత్పత్తులను అమెరికా వినియోగదారులకు అమ్మాలనుకున్నప్పుడు మనం వెంటనే అమెరికన్లుగా మారిపోవాలి. అలాగైతేనే వాళ్ల మనస్తత్వం అర్థం చేసుకోగలం.

*  విద్య అంటే ఒక పూజగదిలాంటిది. భక్తితో అన్నీ సమర్పించాలి. మనం దానికోసం వెచ్చించినదెంత? అని లాభనష్టాల బేరీజు వేసుకోకూడదు.