తారలు దిగి వచ్చిన వేళ..

కేన్స్‌ ఫిల్మ్‌ ఫెస్టివల్‌. సినిమా అవార్డుల పండగే కాదు.. తారల కవ్వించే అందాలు కొలువయ్యే చోటు కూడా. అభిమానులను ఆకట్టుకోవడానికి స్టార్లు ఇక్కడ సోయగాల విందు చేస్తారు. సరికొత్త సొగసుల దుస్తులను తమ ఒంటిపై చోటిస్తారు. ఈ ప్రతిష్ఠాత్మక వేదికపై తమదైన ముద్ర వేయాలని పరితపిస్తారు. హాలీవుడ్‌ తారాగణం, సాంకేతిక నిపుణులు, సూపర్‌ మోడళ్లు.. రెడ్‌కార్పెట్‌పై అందరిదీ ఇదే బాట. పైగా గతేడాది సందడి లేదు. ఆ లోటును భర్తీ చేస్తూ .... రోజుల సంరంభంలో మరింతగా మురిపిస్తున్నారు. ఆ విశేషాలు..

* సూపర్‌ మోడల్‌ బెల్లా హడీడ్‌ ప్రఖ్యాత డిజైనర్‌ జీన్‌ పాల్‌ గాల్టియర్‌ రూపొందించిన ఫిగర్‌ హగ్గింగ్‌ గౌన్‌ ధరించి హొయలు పోయింది. హల్టర్‌ నెక్‌ డిజైన్‌కి తోడు వజ్రాల చెవి రింగులు, స్టేట్మెంట్‌ రింగ్స్‌ ధరించి షోలో ప్రత్యేక ఆకర్షణగా నిలిచింది.

* పాప్‌ సింగర్‌ కార్లా బ్రూనీ వన్‌ షోల్డర్‌ గౌనుతో అదరగొట్టింది. కవ్వించేలా మోకాలిపైకి చీలిన ఈ స్లిట్‌ గౌను కెమెరాలను కట్టిపడేసింది. దీనికితోడు చేతిలో సిల్వర్‌ పర్స్‌తో హుందాగా నడిచొస్తుంటే అంతా ఫిదా అయిపోయారు.

* జర్మన్‌ ఇన్‌ఫ్లూయెన్సర్‌ లియోనీ హన్నే హాలీవుడ్‌ తారల్ని తలదన్నే స్టైల్‌తో మెప్పించింది. స్టార్‌ డిజైనర్‌ నికోల్‌ ఫెలీసియా డిజైన్‌ చేసిన ముదురాకుపచ్చ టుల్డ్‌ ఫ్రాక్‌ ధరించింది. స్లీవ్‌లెస్‌, వీ ఆకారపు నెక్‌ డిజైన్‌తో చూపరుల మతులు పోగొట్టింది. ఈ డ్రెస్‌కి అక్కడక్కడ కూర్చిన తెలుపు రంగు ఈకలు మరో ఆకర్షణ.

* జెస్సికా చస్టెయిన్‌ నలుపు రంగు డ్రెస్‌తో ఆకట్టుకుంది. హృదయాకారపు నెక్‌లైన్‌ కట్‌, లేయర్డ్‌ టుల్డ్‌ డిజైన్‌, వెల్వెట్‌ లైన్లతో బెస్ట్‌ డ్రెస్‌ అంటూ ప్రశంసలు అందుకుంది.

* రోజ్‌ గోల్డ్‌ జంప్‌సూట్‌తో కేన్స్‌లో అందరి చూపు తనపై నిలుపుకున్న మగువ క్యాండిస్‌ స్వేన్‌పోల్‌. ఫ్లోరల్‌ మోతిఫ్స్‌ ఎంబ్రాయిడరీ చేయించి వాటిపై బీడ్స్‌, రైన్‌స్టోన్స్‌, మెటాలిక్‌ మెరుపులతో సందడి చేసింది.