హ్యాండ్‌స్టాండ్‌..జోరందుకున్న ట్రెండ్‌

తారలు మొదలెడితే ట్రెండ్‌ మొదలవుతుందా? మొదలైన ట్రెండ్‌నే వాళ్లు అనుసరిస్తారా? దీనికి సమాధానం చెప్పడం కష్టమే! కానీ వీళ్లు అందిపుచ్చుకున్నాకే.. ఆ ట్రెండ్‌ జోరందుకుంటుందన్నది వాస్తవం. తారల్ని చూశాకే గల్లీల్లో పోరగాళ్లు పోలోమంటూ ఫాలో అవుతారు. సొగసుల చిత్రాంగులు అచ్చంగా వాళ్లనే దించేస్తారు. ‘హ్యాండ్‌స్టాండ్‌’ ఫిట్‌నెస్‌ ట్రెండ్‌ ఇప్పుడు వీళ్ల పుణ్యానే సామాజిక మాధ్యమాన్ని సునామీలా ముంచెత్తోంది. వర్కవుట్‌ వేయడం ఇన్‌స్టాలో పోస్ట్‌ చేయడం ఓ రివాజుగా మారింది. పైగా కథానాయికలు పొట్టి నిక్కర్లు, బిగుతైన దుస్తులు వేసుకొని ఈ ట్రెండ్‌కి సొగసుదనమూ జోడిస్తున్నారు.

బాలీవుడ్‌ ముదురు అమ్మడు మలైకా అరోరా నుంచి టాలీవుడ్‌ లేత భామ అనన్య నాగళ్ల దాకా.. ఈ ఫిట్‌నెస్‌ సవాల్‌ని స్వీకరించి సామాజిక మాధ్యమాల్లోని తమ వాల్‌ని ముంచెత్తుతున్నారు. లావణ్య త్రిపాఠి, శ్రుతీ హాసన్‌, ఫాతిమా సనా షేక్‌, సన్ని లియోన్‌, షామా సికందర్‌, ఆకాంక్ష రంజన్‌ కపూర్‌, రశ్మీ శెట్టిలాంటి వాళ్లూ తలో చెయ్యి వేయడంతో ఈ ఫన్‌ ఛాలెంజ్‌ ఈతరం అమ్మాయిలు, అబ్బాయిల్ని వేగంగా ఆకట్టుకుంటోంది.

చేయడమెలా?: ముందు ఒక కాలిని గోడకి ఆనించి.. వెనక్కి తిరగాలి. తర్వాత కిందికి వంగి రెండు అరచేతులను నేలకి ఆనించి ఇంకో కాలుని మొదటి కాలుకి సమాంతరంగా ఉంచడమే ఈ ట్రెండ్‌ స్టైల్‌. పది నుంచి పదిహేను సెకన్లపాటు ఉంచి యథాస్థానానికి రావాలి.  

ఛాలెంజ్‌ సరే.. సొగసైన పోజులు బాగున్నాయి.. మరి ఈ వర్కవుట్‌తో ఒరిగేదేమైనా ఉందా? అంటే ‘ఓహ్‌.. లేకేం.. బ్రహ్మాండమైన ఉపయోగాలున్నాయి’ అంటున్నారు ఫిట్‌నెస్‌ నిపుణులు.

* ఇది శరీర పైభాగాన్ని దృఢం చేస్తుంది.
* తరచూ చేస్తుంటే శరీరం సమన్వయం, నియంత్రణలో ఉంటుంది.
* అజీర్ణ సమస్యలు తొలగుతాయి.
* ఒత్తిడి తగ్గుతుంది. కోర్‌ స్ట్రెంగ్త్‌ మెరుగుపడుతుంది.
* అంతస్రావ వ్యవస్థ మెరుగుపడుతుంది.