అమెజాన్‌ సొగసులు అదిరెన్‌!

అమెజాన్‌ సొగసులు అదిరెన్‌!

మరో సొగసుల పండగ ముగిసింది. దేశంలోని అతిపెద్ద అమెజాన్‌ ఇండియా ఫ్యాషన్‌వీక్‌లో టాప్‌ డిజైనర్ల డిజైన్ల మిరుమిట్లు, మోడళ్ల క్యాట్‌వాక్‌లు దీపావళికి ముందే వెలుగులు పంచాయి. నాలుగు రోజులపాటు సాగిన ఈ ఫ్యాషన్‌ బొనాంజాలో బాగా ఆకట్టుకున్నవి కొన్ని.
* హేమంత్‌ అండ్‌ నందితాల మెరుపు వర్ణాలు
రంగురంగుల మెరుపు వర్ణాల దుస్తుల డిజైన్లతో ఆకట్టుకున్నారు హేమంత్‌ అండ్‌ నందితాలు. మెడను చుట్టేసిన డిజైన్ల గౌన్లు పాత స్కూల్‌రోజులను గుర్తుకు తెస్తే.. వీపు భాగం కనిపిస్తూ భుజాలకెక్కిన డ్రెస్‌లు ఆధునికతకు అద్దం పట్టాయి.
* తేనెలూరించిన పల్లవీ మోహన్‌
తేనెటీగ స్ఫూర్తితోనే ఈసారి నా డిజైన్లన్నీ చేశానంటోంది పల్లవి. పొడవాటి లేయర్లతో కుట్టిన సల్వార్‌ కమీజ్‌లు.. ఫ్లోరల్‌ అప్లిఖ్‌ డిజైన్లను ‘స్వీట్‌ నెక్టార్‌’ పేరుతో ప్రదర్శించి మోడళ్లు వయ్యారాలు ఒలకబోశారు.
* కొత్తకొత్తగా పంకజ్‌ అండ్‌ నిధిలు
‘క్రోమాటిక్‌’ పేరుతో ఈ డిజైనర్ల ద్వయం ఫ్యాషన్‌వీక్‌లో తమ ముద్ర వేశారు. మెష్‌ టెక్చర్లు, పెయింటర్లీ ప్రింట్ల డిజైన్లు కొత్తకొత్తగా కనువిందు చేశాయి. ముఖ్యంగా కలర్‌ ప్యాలెట్లు దుస్తులకు మరింత వన్నె తెచ్చాయి.
* అతియా వాక్‌ అతిశయం
బెల్‌బాటమ్స్‌, పొడుగాటి చొక్కాలు, బస్టియర్లు.. డిజైన్లు పాతవే అయినా అందులో తన ప్రత్యేకత చూపించింది మసాబాగుప్తా. ఎరుపు, గులాబీ, నీలిరంగు మోనోక్రోమ్‌ డిజైన్ల డ్రెస్‌లు ఆమె డిజైన్లలో ప్రత్యేకంగా నిలిచాయి. బాలీవుడ్‌ భామ అతియాశెట్టి ఈ డిజైన్లకు క్యాట్‌వాక్‌ చేసి ఆకట్టుకుంది.
* రాజేశ్‌ప్రతాప్‌సింగ్‌ సంప్రదాయ మెరుపులు
సంప్రదాయ దుస్తులకు చిరునామాగా పేరున్న రాజేశ్‌ప్రతాప్‌సింగ్‌ సైతం ఈసారి మోనోక్రోమ్‌ డిజైన్లకే పెద్దపీట వేశాడు. వీటిల్లోనూ పోల్కా చుక్కలు, చెక్స్‌, నిలువు గీతల డిజైన్లు హుందాతనం తెచ్చిపెట్టాయి.
* నగధగల ఇలియానా
డిజైనర్‌ దుస్తులే కాదు.. డిజైనర్‌ నగలు సైతం ఈ షోలో తళుక్కుమన్నాయ్‌. శ్రుతి తాపురియా డిజైనర్‌ నగలు.. అభిషేక్‌ కంకారియా మలిచిన హ్యాండ్‌బ్యాగ్‌లాంటి యాక్సెసరీలు ధరించి ఈ షోకే వన్నెతెచ్చింది మన ఇలియానా. ఎరుపురంగు ఫ్రాక్‌, ధగధగలాడే నగలతో వచ్చిన ఇలియానాపైనే చూపులన్నీ నిలిచిపోయాయి.