ఫిట్‌గా ఉంటే ఉచిత టికెట్‌

ఆఫీసుకెళ్లే హడావిడిలో వాలెట్‌ మర్చిపోయి మెట్రో స్టేషన్‌కి పరుగులు పెట్టారు. సరిగ్గా లోపల అడుగుపెట్టాక ఆ విషయం గుర్తుకొచ్చింది. అప్పుడేం చేస్తారు? అడగడానికి అక్కడ స్నేహితులు కూడా లేరు అప్పుడు మీ పరిస్థితి ఏంటి? మన దగ్గరైతే వెనుతిరగాల్సిందే. రష్యాలో మాత్రం అలా కాదు. మాస్కో మెట్రో స్టేషన్‌లో డబ్బులేకపోతే దానికి బదులుగా ఓ ముప్ఫై సిటప్స్‌ లేదా స్వ్కాట్స్‌ తీసి ఫిట్‌నెస్‌ని నిరూపించుకుంటే చాలు. ఉచితంగా మెట్రోరైలు టిక్కెట్‌ దొరుకుతుంది. ఈ మెట్రోస్టేషన్‌లో ఏటీఎంల మాదిరిగా వరుసగా స్క్వాట్‌ సెన్సర్‌ మెషీన్లు ఉంటాయి. రెండంటే రెండు నిమిషాల్లో 30 స్వ్కాట్స్‌ తీయాల్సి ఉంటుంది. అలా తీయలేకపోతే ఆ ప్రయత్నం వృథా అవుతుంది. మళ్లీ కొత్తగా మొదలుపెట్టాల్సిందే. శారీరక దృఢత్వం అనేది క్రీడాకారులకు మాత్రమేకాదు ప్రజలందరికీ అవసరమే అని చెప్పడానికి అక్కడి ఒలింపిక్‌ కమిటీ చేసిన ప్రయత్నం ఇది. ఫిట్‌నెస్‌కి ఫిట్‌నెస్‌... ప్రయాణానికి ప్రయాణం రెండూ ఉచితం అన్నమాట.