పనిమంతులమవుదాం..

పొద్దంతా కంప్యూటర్‌తో కుస్తీ పడుతూనే ఉంటారు. అయినా పని ఎంతకీ తెమలదు. బాస్‌తో శెభాష్‌ అనిపించుకోవాలనే తపనతో రగిలిపోతుంటారు. ఫలితం పెద్దగా కనిపించదు. మరెలా? చేస్తున్న ఉద్యోగం, పనిలో మంచి ఫలితాలు సాధించడమెలా?

❉ రేపు ఏం చేయాలో, ఎలా చేయాలో ఈరోజు రాత్రే ప్రణాళిక వేసుకుంటే సగం పని పూర్తైనట్టే అంటారు. పడక ఎక్కే ముందే చేయాల్సిన పనుల జాబితా స్పష్టంగా ఒక కాగితంపై రాసుకోవడం అలవాటుగా చేసుకోవాలి. దీంతో సమయం చాలా ఆదా అవుతుంది. 

❉  పనులు చాలానే ఉంటాయి. ఏది ముందు చేయాలి? ఏది వాయిదా వేసుకోవచ్చు? ఏది కొంచెం ఆలస్యమైనా ఫర్వాలేదు.. ఇలా విభజించుకుంటే బాస్‌తో చీవాట్లు ఉండవు. చికాకులూ తప్పుతాయి.

❉ క్షణం తీరిక లేకుండా పని చేసినా కొందరికి పెద్దగా ఫలితాలు కనిపించవు. అలా అనిపిస్తే లోపం ఎక్కడుందో ఓసారి రివ్యూ చేసుకోవాల్సిన అవసరం ఉంది. మీకున్న సమయంలోనే పనిని చిన్నచిన్న భాగాలుగా విభజించుకొని ఏ సమయంలో ఏది ముగించుకోవాలో ఒక లక్ష్యం పెట్టుకోవాలి. 

❉ ఈమెయిళ్లు, ఫోన్‌కాల్స్, సామాజిక మాధ్యమాలు, గేమ్స్, సినిమాలు.. ఇవన్నీ ఏకాగ్రత చెడగొడతాయి. పని చేసేటప్పుడు ఫోన్‌ స్విచ్చాఫ్‌ చేయడం, సోషల్‌మీడియా నోటిఫికేషన్లు ఆఫ్‌ చేయడం, షాపింగ్‌ సైట్లు తెరవకపోవడం.. ఉత్పాదకతను పెంచుతాయి. 

❉ ఒకే సమయంలో నాలుగైదు రకాల పనులు చేయాలనుకోవడం అంత మంచిది కాదు. ఒక అధ్యయనం ప్రకారం మల్టీ టాస్కింగ్‌ చేయడం వల్ల ఉత్పాదకత 40 శాతం పడిపోతుందని తేలింది.

❉ చుట్టూ ఉన్న వాతావరణం బాగుంటే.. ఆటోమేటిగ్గా పనిలో వేగం పెరుగుతుంది. బాతాఖానీలు కొట్టేవాళ్లకి దూరంగా, మంచి పోటీ వాతావరణం ఉన్న వ్యక్తుల మధ్య ఉండేలా చూసుకోవాలి.