ఆఫీసు ఫ్రెండూ.. అవసరమేగా

ఏదైనా పని చేస్తున్నప్పుడు పక్కన ఫ్రెండ్‌ ఉంటే ఆ హుషారే వేరు. చకచకా చేసేస్తుంటాం. ఆఫీసు పనీ అందుకు మినహాయింపేం కాదు! సహోద్యోగులే సన్నిహితులైతే వాళ్లు ఛీర్‌లీడర్లలా మారి.. మన పనిలో ఉత్పాదకత పెరిగేలా చేస్తారంటున్నాయి అధ్యయనాలు. అదెలా అంటే..

* ఆఫీసు పని ఎప్పుడూ సాఫీగా సాగిపోదు. ఒక్కోసారి తీవ్రమైన ఒత్తిడి ఉంటుంది. మరోసారి తీరిక లేనంత పని ఉంటుంది. ఆ సమయంలో ఆదుకుంటూ.. బాధ పడితే ఓదార్చే ఫ్రెండ్‌ సహోద్యోగి అయితే ఎంతో బాగుంటుంది కదూ.
* అర్థం చేసుకునేవాళ్లు.. ఆదుకునేవాళ్లు.. సంతోషాన్ని పంచేవాళ్లు పక్కనే ఉన్నారంటేనే ఉద్యోగులకు ఒకరకమైన ధీమా ఉంటుందట. ఎప్పుడూ ఆ ఫీలింగ్‌లో ఉన్నవాళ్లు కార్యాలయాలకు డుమ్మా కొట్టడం చాలా తక్కువంటున్నాయి అధ్యయనాలు.
* కార్పొరేట్‌, మార్కెటింగ్‌, ఐటీ.. ఇలాంటి రంగాల్లో ముందుకెళ్లడానికి టీం వర్క్‌ కీలక పాత్ర పోషిస్తుంటుంది. సహోద్యోగులే స్నేహితులైతే జట్టుగా, సమష్టిగా ఉత్సాహంగా పని చేయడానికి ఎవరైనా ఇష్టపడతారు.
* ‘వర్క్‌ ప్లేస్‌ ఫ్రెండ్షిప్‌ అండ్‌ హ్యాపీనెస్‌’ అనే ఒక అధ్యయనం ప్రకారం.. 35 ఏళ్ల లోపు యువ ఉద్యోగుల్లో 57శాతం మంది.. సహోద్యోగులే తమ క్లోజ్‌ఫ్రెండ్స్‌ అని చెప్పారు.
* పని చేసే చోట ఉద్యోగుల మధ్య పోటీ వాతావరణం తప్పకుండా ఉంటుంది. స్నేహితులైన సహోద్యోగులతో పోటీ పడాల్సి వస్తే.. సానుకూల పోటీ వాతావరణం ఉంటుందంటున్నాయి అధ్యయనాలు.