అలా మస్కా కొట్టేశాడు!

కాలేజీ డైరీ

డెబ్భైశాతం హాజరు దాటితేనే సెమిస్టర్‌ పరీక్షలకు అనుమతించడం మా కాలేజీ సంప్రదాయం. కాలేజ్‌ క్లబ్‌ ఈవెంట్స్‌లో పాల్గొంటే, కల్చరల్‌ యాక్టివిటీస్‌లో చురుగ్గా ఉంటే దీనికి మినహాయింపు ఇస్తారు.  ఇవేమీ లేకపోతే కచ్చితంగా డాక్టరు నుంచి మెడికల్‌ సర్టిఫికెట్‌ తీసుకురావాల్సి ఉంటుంది. నా ఫ్రెండ్‌ సుజిత్‌ క్లాసులకు హాజరైంది తక్కువ. సెమిస్టర్‌ పరీక్షలు రాయాలంటే సర్టిఫికెట్‌ తీసుకు రమ్మన్నారు మా హెచ్‌వోడీ. మావాడు ఏదోలా కష్టపడి డాక్టరు ఇచ్చిన పత్రం తీసుకొచ్చాడు. పరీక్షలకు హాల్‌ టికెట్‌ ఇచ్చారు. రెండు ఎగ్జామ్స్‌ రాశాక సుజిత్‌ ఆ ధ్రువీకరణ పత్రం కాపీ మాకు చూపించాడు. ఇంతకీ తనకి ఆరోగ్యం బాగా లేదని ఎవరితో సర్టిఫికెట్‌ తీసుకొచ్చాడో తెలుసా? ఒక గైనకాలజిస్టుతో. ఇంక వేరే చెప్పాలా? మేం పొట్టచెక్కలయ్యేలా నవ్వుకున్నామని.