క్లాసులో లేవుగా..

కాలేజీ డైరీ

మా లెక్చరర్‌ ఓరోజు ‘రేపు ఆటోక్యాడ్‌ డ్రాయింగ్స్‌ వేసి తీసుకురండి’ అన్నారు. దీని ఆధారంగానే ఇంటర్నల్‌ మార్కులు వేస్తానని చెప్పారు. మర్నాడు అందరితోపాటు నన్నూ అడిగారు. ‘తీసుకొచ్చాను.. చూపిస్తాను సర్‌’ అని ధీమాగా చెప్పాను. నిజానికి నేను ఏ డ్రాయింగూ వేయలేదు. ఆయన మరీ అంత గట్టిగా అడగరు అనే తేలికభావంతో ఉన్నాను. మళ్లీ అడిగితే ‘కాసేపు ఆగండి సర్‌. నా ల్యాప్‌టాప్‌ ఓపెన్‌ చేసి డ్రాయింగ్స్‌ చూపిస్తాను’ అన్నాను గంభీరంగా. సర్‌ అక్కడి నుంచి కదలేదు. నాలో గుబులు మొదలైంది. ‘నాకు తెలుసు.. నువ్వు వర్క్‌ చేయలేదని. ఎందుకంటే ఆ సాఫ్ట్‌వేర్‌ గురించి నిన్న పాఠం చెబుతున్నప్పుడు నువ్వు క్లాసులో లేవు. అంతేగా’ అన్నారు. పది నిమిషాలు గడిచినా నేనేమీ చూపించలేక తత్తరపాటుకి గురయ్యా. ముందు నిశ్శబ్దంగా.. తర్వాత నవ్వులతో నిండిపోయింది క్లాసంతా. నాకు నామోషీ అనిపించి పట్టుబట్టి ఆ రాత్రంతా డ్రాయింగ్స్‌ వేసి మర్నాడు సర్‌కి చూపించాను.