వింటే ఒత్తిడి చిత్తవుతుంది!

శక్తిని నింపుకొనేందుకు... ‘హై పవర్‌ పోజ్‌’

  ఉన్నత చదువుల్లో... ఉద్యోగాల్లో అనుకోకుండా ఒత్తిడి ఆవహిస్తుంది. భుజాలు కుంగిపోయి... కుర్చీలో కూలబడినట్లుగా... టేబుల్‌పై వాలిపోయినట్టుగా అయిపోతారు. అలాంటి సందర్భాల్లో ‘హై పవర్‌ పోజ్‌’ని ఆవాహనం చేసుకుంటే మంచి ఫలితాల్ని పొందొచ్చని హార్వర్డ్‌ విశ్వవిద్యాలయం పరిశోధకులు చెబుతున్నారు. బలంగా ఊపిరి తీసుకుని హై పవర్‌ పోజులోకి వస్తే చాలు... కేవలం రెండు నిమిషాల్లోనే అధిక స్థాయిలో టెస్టోస్టీరాన్‌ విడుదలై ఒత్తిడికి కారణమయ్యే కార్టిజోల్‌ హార్మోన్‌ ప్రభావాన్ని తగ్గిస్తుందని తేల్చారు.

మీ కౌగిలిలో మీరే... ‘హగ్‌ యువర్‌సెల్ఫ్‌’

 మీరంటే మీకెంత ఇష్టమో తెలియాలంటే? మిమ్మల్ని మీరు కౌగిలించుకోవాల్సిందే. అప్పుడే ఒత్తిడి మీ దరిచేరదు అంటున్నారు టెక్సాస్‌ విశ్వవిద్యాలయ మానసిక నిపుణురాలు క్రిస్టిన్‌ నెఫ్‌. మీరో ఒంటరనో... మిమ్మల్నెవరూ అర్థం చేసుకోవడం లేదనో... మానసిక ఒత్తిడికి గురైనప్పుడు మీ కోసం మీరు ఉన్నారన్న విషయం గ్రహించాలి. మిమ్మల్ని మీరే కౌగిలించుకోవాలి. అప్పుడు విడుదలయ్యే ఆక్సిటోసిన్‌ హార్మోన్‌ కార్టిజోల్‌ని నియంత్రిస్తుంది. దీంతో ఆందోళన స్థాయి తగ్గి గుండె రక్తనాళాలపై ఒత్తిడి తగ్గి మనసుకి హాయిగా అనిపిస్తుంది.

ఇదో ఉపశమనం... ‘చాప్‌స్టిక్స్‌’

పళ్ల మధ్యలో ఇరుక్కున్న వాటిని తీసేందుకు వాడే పెన్ను, పెన్సిల్‌ ముక్కు మొదలుకుని సురక్షితమైన చాప్‌స్టిక్స్‌ వరకూ మానసిక ఒత్తిడి నుంచి కాస్త ఉపశమనం అందిస్తాయనేది కేన్సాస్‌ విశ్వవిద్యాలయం పరిశోధకుల మాట. వారి పరిశోధనలో భాగంగా కొందరికి చాప్‌స్టిక్స్‌ ఇచ్చి క్లిష్టమైన పనుల్లో వారి పని తీరుని గమనిస్తే చాప్‌స్టిక్స్‌ వాడిన వారిలో ఒత్తిడి స్థాయి తక్కువగా ఉన్నట్టు తేలింది.

దర్జాగా వెనక్కి... ‘షోల్డర్స్‌ బ్యాక్‌’

మెదడు ప్రభావం శరీరంపై ఏ స్థాయిలో ఉంటుందో... ఇదే మాదిరిగా శరీర భంగిమలూ మెదడును ప్రభావితం చేస్తాయన్నది శాస్త్రవేత్తల మాట. ఒత్తిడి నుంచి ఉపశమనానికి ఒళ్లు విరుచుకోవడం... లేదంటే రెండు చేతుల్నీ తల వెనక్కి పెట్టి బలంగా బిగించి పాజిటివ్‌ దృక్పథంతో ఆలోచిస్తే మెదడులో చురుకైన హార్మోన్లు విడుదలై ప్రశాంతంగా అనిపిస్తుందట.

చిందేయండి... ‘ఫైవ్‌ మినిట్‌ డ్యాన్స్‌ మూవ్‌’

మూడ్‌ బాలేదని ముడుచుకుని కూర్చుంటే ఎలా? కాలం మీ కోసం ఎదురు చూడదు. అందుకే ఓ ఐదు నిమిషాలు కాలంతో పాటే చిందేయండి. అంతే... మీలో హుషారు పుట్టుకొచ్చి తిరిగి రీఛార్జ్‌ అవుతారని యార్క్‌ అండ్‌ షెఫీల్డ్‌ విశ్వవిద్యాలయం పరిశోధకులు చెబుతున్నారు. దీంట్లో భాగంగా ఐదు నిమిషాలు మ్యూజిక్‌ ప్లే చేస్తూ కొందరిని వినమని... మరికొందరిని డ్యాన్స్‌ చేయమని కోరారు.. తర్వాత వారి మానసిక స్థితిని గమనిస్తే డ్యాన్స్‌ చేసినవారిలో  గణనీయమైన మార్పు కనిపించిందట.

తలూపండి... అంతే!... ‘నాడ్‌ యువర్‌ హెడ్‌’

సమాధానం చెప్పేటప్పుడో... చర్చల్లోనో... కచ్చితమైన అవగాహన ఉంటేనే అవుననో... కాదనో చెప్పాలి. ఒకవేళ ఏవైనా సందేహాలు ఉన్నా... అయోమయంగా అనిపించినా... కంగారు పడి ఆందోళనకు లోను కాకుండా... తలని ఆపకుండా కిందికీ... పైకీ.. ఊపుతూనే ఉండాలి. దీంతో ఒత్తిడి తగ్గి ఆత్మవిశ్వాసం పెరుగుతుందట.ఒహైయో విశ్వవిద్యాలయానికి చెందిన మానసిక శాస్త్ర నిపుణులు ఇదే చెబుతున్నారు.

వెన్ను నిటారుగా... ‘సిట్‌ అప్‌ స్ట్రైట్‌’

ఎక్కడైనా జారబడి కూర్చుంటే అంతా నీరుగారే వాతావరణమే. నీరసం ఆవహించి మెదడు ఉత్తేజితం కాదు. అందుకే వెన్ను నిటారుగా ఉంచి కూర్చుంటే ఆత్మవిశ్వాసం పెరిగి మెదడు చురుకుగా పని చేస్తుందనేది మానసిక శాస్త్ర నిపుణుల మాట.

మీదైన నడక... ‘వాక్‌ హ్యాపీ’

ఖుషీ సినిమాలో పవన్‌ కళ్యాణ్‌, భూమిక వెనక నడుస్తూ మాట్లాడే సంభాషణ ఎప్పటికీ మర్చిపోలేం! అక్కడ పవన్‌ నడకలో ఉత్సాహం, ఉత్సుకత కనిపిస్తుంది. మీ నడకలోనూ అంతే ఉత్సాహం ఉండాలి. అప్పుడే మనసంతా పాజిటివ్‌ ఆలోచనలతో నిండి ఉంటుందని సైకాలజీ నిపుణులు చెబుతున్నారు.

పొట్ట చెక్కలవ్వాలి... ‘బెల్లీ లాఫ్‌’

కడుపారా నవ్వుకునేందుకు కారణాలు వెతుక్కోనక్కర్లేదు. హాయిగా నవ్వేయండి. మిత్రుల జోకులకు మెచ్యూర్డ్‌గా ప్రవర్తిస్తూ మితంగా నవ్వక్కర్లేదు. కడుపు చెక్కలయ్యేలా నవ్వండి. దీంతో రక్తంలో ఆక్సిజన్‌ శాతం పెరిగి ఒత్తిడి మాయం అవుతుందట. అందుకే ‘ఫేక్‌ స్మైల్‌’కి బాయ్‌ చెప్పేసి పగలబడి నవ్వండి.