ప్రేమను ప్రేమతోనే గెలుద్దాం

గౌరవనీయులైన తల్లిదండ్రులకు

నరికితే...
ప్రేమికులు చనిపోవచ్చునేమో... ప్రేమ కాదు..
విడదీస్తే...
మతాలు బతకొచ్చునేమో.. ప్రేమికులు కాదు...
పిల్లలే ప్రాణమంటారు.. ఆ పిల్లల ప్రాణాలే బలికావాలంటారు
ఎందుకు అమ్మానాన్నల్లారా..?

మీరూ మా వయసు దాటే వచ్చి ఉంటారు. మీరూ ఏదో సందర్భంలో  ప్రేమ రుచి చూసే ఉంటారే... మరి మా ప్రేమ గురించి తెలిసినప్పుడు మీ ప్రేమ రోజులు ఒక ్కసారి గుర్తు చేసుకోండి. అప్పటికీ కోపం వస్తే అప్పుడు ఆగ్రహించండి. తెలిసీతెలియని వయసులో ప్రేమించామనుకో... తెలియజెప్పండి. ప్రేమగా దగ్గరికి తీసుకొని  వివరించండి. మీ మాట ఎప్పుడూ కాదనని మేం ఎందుకు వ్యతిరేకిస్తున్నామో ఒక్కసారి మా మనసులోకి తొంగిచూడండి. మేం మీకంటే చిన్నపిల్లలం... తప్పు చేయొచ్చు.  మీరు వాటిని సరిదిద్దాలి గానీ.. తీవ్రనిర్ణయాలు తీసుకుంటే ఎలా? ఇష్టమైనవేవో నిర్భయంగా చెప్పే స్వాతంత్య్రం ఇచ్చిన మీరే ఆ స్వేచ్ఛను నొక్కిపట్టేస్తే ఎలా? ప్రేమ...  ఊపిరి... మరి దాన్ని బంధించాలనుకుంటే ఎలా? దాన్ని మీకు తగని రీతిలో, తగిన మార్గంలో తిప్పుకోవాలి. అంతేతప్ప ఆపేస్తామంటే ఎలా?

* మేం సంతోషంగా ఉండటమే మీ లక్ష్యమైతే... మేం ఇలాగే బాగుంటామంటుంటే ఎందుకు పట్టించుకోరు? ఒకవేళ మేం వెళుతున్న మార్గంలో ఇబ్బందులుంటే చెప్పండి. వీలైతే వాటిని అధిగమించేందుకు సాయం చేయండి. చిన్నప్పటి నుంచి వేలుపట్టి నడిపించిన మీరే... ఇప్పుడు వేరు చేస్తే మా మనసులు ఎంతగా విలవిలలాడతాయి? ఆస్తిపాస్తులే ముఖ్యమా? మనకు ఎక్కువ ఉన్నప్పుడు మేం ప్రేమించిన వారికి అవి ఇచ్చి ప్రోత్సహించవచ్చు కదా!

* కులం, మతం... అంత పట్టింపా? ఒకే కులంలో చేసుకున్న జంటలు బాగున్నాయా? ఒకే మతంలో చేసుకున్న దంపతులు విడిపోవడం లేదా? కులం వేరైతేనే వచ్చే ఇబ్బంది ఏంటి? మా సంతోషమే కోరుకుంటే కులం, మతం పెద్ద విషయమా? దీని కోసం ఎంతో ఇష్టమైన మమ్మల్నే ద్వేషిస్తారా?

* సమాజం ఏమనుకుంటుందో అంటారు... మనం చనిపోతేనో? చంపితేనో ఊరుకుంటుందా? అప్పుడూ అనుకుంటుంది కదా! మీ పెంపకం మీద మచ్చ పడుతుందని భయపడతారా? ప్రేమించి, పెళ్లి చేసుకొని బాగుంటే... ఏమీ అనలేదు. మీ పెంపకానికి మచ్చా రాదు. అలా మీరు మమ్మల్ని ప్రేరేపించండి. మేం నిలదొక్కుకునేలా ప్రోత్సహించండి. అప్పుడు మీ ప్రేమా గెలుస్తుంది. మా ప్రేమ నిలుస్తుంది.

ప్రియమైన పిల్లలకు...

మా కడుపు కాల్చుకొనైనా మీ ఆకలి తీరుస్తాం
మీకు దెబ్బ తగిలితే మేం కన్నీళ్లు పెట్టుకుంటాం
మీరే లోకంగా బతుకుతుంటే.. మాది వేరే లోకమంటారు మీరు!
ఎందుకు పిల్లల్లారా?

మీకు జ్వరమొస్తే... ఎన్ని రాత్రుళ్లు మేల్కొన్నామో తెలుసా? మిమ్మల్ని మంచి దుస్తుల్లో చూడటానికి మేం పాత బట్టలతోనే సరిపెట్టుకున్నామని గమనించారా? మిమ్మల్ని  మంచి చదువులు చదించడానికి మా రక్తమాంసాలనే చెమటగా మార్చామని ఊహించగలరా? మీకు గౌరవప్రదమైన జీవితం ఇవ్వడానికి ఎన్ని అవమానాలు భరిస్తున్నామో  ఆలోచించారా? మీకోసం ఇన్ని చేస్తుంటే... మమ్మల్ని, మా అభిప్రాయాలను కాలదన్ని వెళ్లిపోతారా? అప్పుడే పుట్టిన ప్రేమే ఎక్కువనుకుంటే... మీరు పుట్టకముందు నుంచే మాలో మీపై పుట్టిన మా ప్రేమ సంగతేంటి? మరి దానికి సమాధానం ఇవ్వాల్సిన బాధ్యత మీ మీద లేదా? మీ ప్రేమను గెలిపించుకోవడానికి... మా ప్రేమను చంపేయాలా?

* మీకు చిన్న దెబ్బ తగిలితే ఎంతగానో విలవిలలాడిపోయే మేం... మిమ్మల్ని హింసించడానికీ వెనుకాడటం లేదంటే మాలో ప్రేమను ఎంతగా చంపేశారో  ప్రశ్నించుకోండి. చదువు పూర్తికాదు... ముక్కుపచ్చలే ఆరవు... అప్పుడే మీరు ఎవరితోనే తిరుగుతుంటే... మాకు ఎంత కోపం వస్తుంది? ముందు బాగా చదువుకోండి.  స్థిరపడండి. తర్వాత ప్రేమ గురించి చెప్పండి. మేం ఆలోచిస్తామో? లేదో? మీకే తెలుస్తుంది!

* మీరు బాగుండటమే మా జీవితాశయం. మీరు ఎవరినో ప్రేమిస్తారు. వాళ్ల గురించి మీకు తెలిసినంత మాకు తెలియదు కదా! తెలియజెప్పండి. ప్రేమించామని చెప్పగానే ఓకే అనకపోవడానికి మాకు సవాలక్ష కారణాలుంటాయి. వాటిని ఒక్కొక్కటీ తెలుసుకొని సమాధానం ఇవ్వండి. మేం ఒప్పుకునేంత వరకూ వేచిచూడండి. ఒకవేళ మీకు వేరే సంబంధాలు చూస్తుంటే వ్యతిరేకించండి. గట్టిగా గొడవపడండి. మీకు అంగీకారం లేకుండా చిన్న వస్తువైనా ఇంట్లోకి తేకూడదనుకొనే మేం... మీ జీవితంలోకి ఇంకొకరిని  ఎలా తెస్తాం?

* మా అభిమానం, మా గౌరవానికి ఇబ్బంది లేకుండా మీ ప్రేముంటే ఎందుకు కాదంటాం? కులం, మతం, ఆస్తి, అంతస్తులు సంగతెలా ఉన్నా... మా పిల్లలు సంతోషంగా ఉండాలనేది మా ఏకైక లక్ష్యం. మరి దాన్ని సమాధాన పరచండి. అంతేగానీ ఏదో కోప్పడ్డామని ఇంట్లోంచి వెళ్లిపోతే ఎలా? జీవితంలో ఎలాంటి భరోసా లేకుండా పెళ్లి చేసుకుంటే ఎలా? మేం ఏమైపోవాలి...? మా ప్రేమ ఏమైపోవాలి?

ఒక వేదిక అవసరం

పిల్లల మీద ఆశలన్నీ పెట్టుకుంటారు తల్లిదండ్రులు. వారు తమ మాట కాదనకూడదని అనుకుంటారు. వారికి అలివికాని ప్రేమను పంచుతారు. ఒక్కసారిగా పిల్లలు ప్రేమ విషయంలో ఎదిరిస్తే... తట్టుకోలేరు. తమను ధిక్కరిస్తున్నారని ఆవేశపడిపోతారు. తమ అధికారాన్ని ప్రశ్నిస్తున్నారని ఆగ్రహం వ్యక్తం చేస్తారు. పిల్లలకు ఇవి నచ్చక  ఇంట్లోంచి వెళ్లిపోవడం, పెళ్లి చేసుకోవడం... లాంటి పిచ్చి నిర్ణయాలు తీసుకుంటారు. ఇది తల్లిదండ్రుల్లో మరింత అసహనాన్ని పెంచుతుంది. అదే నేరాలకు దారితీస్తుంది. పిల్లలకు ఓర్పు లేకపోవడం, జీవితభాగస్వామిని ఎన్నుకునే స్వేచ్ఛ పిల్లలకు ఉందని పెద్దలు గుర్తించకపోవడం వల్ల సమస్యలు మరింత జఠిలంగా మారతున్నాయి.  ఇలా కాకుండా ఉండటానికి ప్రేమకు సంబంధించి తమ సమస్యలు చెప్పుకోవడానికి ఒక వేదిక ఉండాలి. యువతైనా, పెద్దలైనా ఇలాంటి సమస్యలొచ్చినప్పుడు... ఆ వేదికను ఆశ్రయించే వెసులుబాటు కల్పించాలి. అప్పుడు పరిష్కారాలు దొరికే అవకాశాలున్నాయి.