కావాలోయ్‌...ఒంటరి!

కావాలోయ్‌...ఒంటరి!

టీ తాగడానికెళ్లినా తోడుండాలి.. సినిమాకెళ్తే పక్కసీట్లో ఫ్రెండుండాలి.. వూ­రు దాటాలంటే పక్కన ఎవరైనా ఉంటేనే హుషారు.. స్నేహామేరా జీవితం.. స్నేహమేరా శాశ్వతం అనుకునేవాళ్లకి ఇది ఓకే. కానీ అన్నివేళలా ఇది పనికి రాదు. జీవితంలో ఒక్కసారైనా ఒంటరిగా పర్యటనలకు వెళ్లిరావాలి అనేది సైకాలజిస్టుల మాట. ఎందుకంటే?
* ప్రతి పర్యటనని స్నేహితులు/మనసుకి నచ్చినవారితో గడిపేవాళ్లే ఎక్కువ. ఇలాంటి వాళ్లు అనుకోకుండా ఏదైనా లాంగ్‌ట్రిప్‌కి వెళ్లాల్సి వస్తే? గుండె దడే. అది తప్పాలంటే ఒంటరి పర్యటన అవసరం. దీంతో ఆత్మవిశ్వాసం పెరుగుతుంది.
* చాలామంది ఒక కంఫర్ట్‌జోన్‌లోనే ఉంటారు. కొత్త ప్రదేశానికి వెళ్లాలంటే భయం. ఇష్టముండదు. ఒంటరి ప్రయాణాలతో ఈ భయాల్ని పారదోలవచ్చు. మొదట్లో కొంచెం ఇబ్బందిపడ్డా కొత్త అనుభవాలతో సరికొత్త ప్రపంచంలోకి అడుగేయొచ్చు.
* స్నేహితులు, ప్రేమికులతో ప్రయాణిస్తే తిండి, విడిది, చూడాల్సిన ప్రదేశం.. ప్రతి దాంట్లో ఇంకొకరిని అనుసరించాల్సిందే. ఒంటరి ప్రయాణంలో ఈ బాధలుండవు.
* ఒంటరి ప్రయాణాలు కొందరికి అసలు పడవు. లోలోపల ఏవో భయాలు వెంటాడతాయి. ఈ భయం పోవాలన్నా ఒంటరి ప్రయాణం చేసి తీరాల్సిందే. మనసు, శరీరం రెండూ సిద్ధం అయినపుడే పరుగులు తీయొచ్చు.
* జట్టుగా వెళితే పక్కనుండేది ఎప్పుడూ తెలిసిన మొహాలే. ఏకాకి అయితే.. ఈ ప్రపంచంతోనే స్నేహం చేయొచ్చు. కొంచెం చొరవ చూపిస్తే స్థానికులు, సాటి పర్యటకులు.. ఎవరైనా మీ నేస్తాలే.
* ఒంటరి ప్రయాణంలో ప్రపంచాన్ని చూడ్డానికి బోలెడంత సమయం ఉంటుంది. ముఖ్యంగా నీ గురించి నీవు ఆలోచించొచ్చు. వచ్చిన కారణం.. ప్రాధాన్యం.. ప్యాషన్‌ నిన్ను నీవు కొత్తగా ఆవిష్కరించుకోవడానికిదో మార్గం.
* మనసుకి నచ్చినవాళ్లకు దూరమైతే ప్రేమలు పెరుగుతాయంటారు. సోలో టూర్‌ ఎడబాటుతో మనసుకి నచ్చినవాళ్లను ఎంతగా మిస్‌ అయ్యామో తెలిపేందుకు కూడా దోహదపడుతుంది.