కట్‌ చేస్తే.. కత్తిలాంటి ఫ్యాషన్‌

సినీ తారలంటే అభిమానుల దృష్టిలో ఆకాశం నుంచి దిగొచ్చిన తారలే. వాళ్ల అందాన్ని రెట్టింపు చేయడంలో వాళ్లు ధరించే ఔట్‌ఫిట్‌లది కీలక పాత్ర అనడంలో ఏమాత్రం సందేహం లేదు. అందుకే మరి తరచూ కొత్త ఫ్యాషన్లకి తమ ఒంటిపై చోటిస్తారు. సొగసులకు చిరునామాగా ఉంటారు ఆ నారీమణులు. ఆ ఊపులోనే టాలీవుడ్‌, బాలీవుడ్‌ అనే తేడా లేకుండా ప్రస్తుతం అందరూ ఆదరిస్తున్నవి కటౌట్‌ డ్రెస్‌లు. ‘శాకుంతలం’ ప్రమోషన్‌లో భాగంగా టాలీవుడ్‌ అగ్ర నాయిక సమంత కటౌట్‌ మాక్సీ డ్రెస్‌ వేసి ఆకట్టుకుంది. అంతకుముందు ముదురు భామ మలైకా అరోరా ఒక పుట్టినరోజు పార్టీలో బస్ట్‌ కటౌట్‌తో కవ్వించింది. ఇప్పుడిప్పుడే సెలబ్రిటీల జాబితాకెక్కుతున్న షారుక్‌ఖాన్‌ తనయ సుహానా సైతం తెలుపు రంగు కాటన్‌ కటౌట్‌ డ్రెస్‌తో ఇన్‌స్టాగ్రామ్‌ని ముంచెత్తింది. ‘హీరోపంతీ’ భామ కృతి సనన్‌ సైతం.. నలుపు రంగు గౌనుకి వీ ఆకారం కటింగ్‌ ఇచ్చుకొని ముంబయిలో ఓ ఫ్యాషన్‌ స్టోర్‌ ప్రారంభానికొచ్చింది. దీన్ని ప్రముఖ డిజైనర్ల ద్వయం శంతను-నిఖిల్‌ రూపొందించారట. నడుము, వీపు, ఉదరం, వక్షం, కాళ్లు.. ఇలా ఎక్కడ కావాలంటే అక్కడ కటౌట్‌తో తమ అందాన్ని ఇనుమడింపజేయడానికే ఈ ట్రెండ్‌ని తారామణులు ఎక్కువగా ఫాలో అవుతున్నట్టు తెలుస్తోంది. హీరోయిన్లే కాదు.. ఆధునికంగా కనిపించాలనుకునే మెట్రో నగరాల్లోని అమ్మాయిలూ ఈ ఫ్యాషన్‌ని ఇష్టపడుతున్నారు.