వ్యాయామంతో యవ్వనం

కసరత్తులు చేస్తే కలిగే ప్రయోజనాలు బోలెడని కుర్రకారు ఎవరిని అడిగినా ఇట్టే చెబుతారు. వ్యాయామంతో ఫిట్‌నెస్‌ సొంతమవుతుంది. ఆరోగ్యంగా ఉంటాం. బరువు తగ్గుతాం. కండలు పెరుగుతాయి. ఇంతేనా? ఇప్పుడో కొత్త సంగతి తెలిసింది. క్రమం తప్పకుండా వ్యాయామం చేస్తే యవ్వనం తరిగిపోకుండా ఉంటుందట. ముఖ్యంగా వయసు పెరిగినకొద్దీ వచ్చే కొన్ని రకాల రుగ్మతలు దరి చేరకుండా ఉంటాయంటున్నారు పరిశోధకులు. ‘క్లినికల్‌ న్యూట్రిషన్‌ అండ్‌ మెటబాలిక్‌ కేర్‌’ జర్నల్‌లో ప్రచురితమైన పరిశోధన ప్రకారం.. వారానికి 150 నిమిషాల పాటు వ్యాయామం చేయడం వల్ల ఈ ఫలితాలు దక్కుతాయట. కసరత్తులు చేసినప్పుడు అన్ని అవయవాలకు ఆక్సిజన్‌ అంది.. మజిల్‌ మాస్‌ వృద్ధి చెంది.. కొన్నిరకాల క్యాన్సర్లు దరిచేరవట. వయసురీత్యా వచ్చే సమస్యలూ తగ్గుతాయంటున్నారు పరిశోధకులు.