virat Kohli: కోహ్లీలా.. కోపమొద్దు..

విరాట్‌ కోహ్లీ అంటే ఓ యూత్‌ ఐకాన్‌. మైదానంలోకి దిగితే కేరింతలు.. బ్యాటుతో పరుగుల వరద పారిస్తుంటే.. కేకలు. తనని అభిమానించేవాళ్లైతే కోకొల్లలు. ఇంత మంచి పేరున్నా.. తరచూ కయ్యానికి కాలు దువ్వుతాడనే విమర్శలూ ఎదుర్కొంటున్నాడు. తాజాగా సీనియర్‌ క్రికెటర్‌ గౌతం గంభీర్‌తో గొడవకి దిగి రూ.కోటి జరిమానా ఎదుర్కొన్నాడు. అదుపు లేని కోపమే వీటిన్నింటికీ కారణం. కోహ్లీనే కాదు.. ఎన్ని గొప్ప లక్షణాలు ఉన్నవాళ్లనైనా.. ఈ కోపం పాతాళానికి లాగుతూనే ఉంటుంది. దీన్ని అదుపులో పెట్టడమెలా?

* మాట కత్తికన్నా పదునైంది. కోపంలో వదిలే ఒక్కో పరుషమైన మాట ఎదుటివాళ్ల హృదయాల్ని చీల్చేస్తుంది. అందుకే వాదన ముదురుతుంది అని భావించినప్పుడే నోటికి అడ్డుకట్ట వేసి మౌనాన్ని ఆశ్రయించడమే మంచిది.
* నోటి నుంచి బయటికొచ్చిన మాటని వెనక్కి తీసుకోలేం. ఆ కోపమే ఒక్కోసారి ఇద్దరు వ్యక్తుల మధ్య పగలు, ప్రతీకారాల దాకా వెళ్తుంది. ఆ పరిస్థితి రాకుండా ఉండాలంటే.. కోపం చల్లారాకైనా.. ఎదుటివాళ్లకి మనస్ఫూర్తిగా క్షమాపణలు చెబితే సరి. సగం నష్టనివారణ జరిగినట్టే.
* నడక, చిన్నచిన్న వ్యాయామాలు తరచూ చేస్తుంటే కోపం అదుపులో ఉంటుందని చాలా అధ్యయనాల్లో తేలింది. ధ్యానం, యోగా సైతం.. మనసుని ప్రశాంతంగా ఉంచే మార్గాలే.
* తప్పు చేయనివాళ్లు అంటూ ఎవరూ ఉండరు. ప్రతి ఒక్కరిలో కొన్ని అవలక్షణాలుంటాయి. వీటిని వ్యక్తిగతంగా తీసుకొని ఎదుటివాళ్లను శత్రువుగా చూడొద్దు. క్షమాగుణం ఉన్నప్పుడు కోపం, ప్రతీకారం అనే పదాలకే మన డిక్షనరీలో చోటుండదు.
* హాస్యం.. ఒక వ్యక్తిలోని కోపాన్ని తగ్గించే ఔషధం అంటారు అధ్యయనకారులు. సరదాగా ఉండే వ్యక్తులతో ఎక్కువ సమయం గడపడం, కామెడీ వీడియోలు చూడటం.. ఇవీ కోపాన్ని తగ్గించే మార్గాలే.