AP PRC: పీఆర్సీ జీవోలు రద్దు చేయాల్సిందే..ఉద్యోగుల రిలేదీక్షలు..

అమరావతి: ఏపీలో పీఆర్సీ జీవోలను రద్దు చేయాలని డిమాండ్‌ చేస్తూ సమ్మె నోటీసు ఇచ్చిన ఉద్యోగ సంఘాలు ఉద్యమాన్ని ఉద్ధృతం చేశాయి. పీఆర్సీ సాధన సమితి నేతృత్వంలో రాష్ట్రవ్యాప్తంగా ఉద్యోగ, ఉపాధ్యాయ, కార్మిక, పెన్షనర్ల సంఘాలు నిరసనలు కొనసాగిస్తున్నాయి. విజయవాడ గాంధీనగర్‌లోని ధర్నాచౌక్‌, గుంటూరులో కలెక్టరేట్‌ ఎదురుగా ఉద్యోగులు రిలేదీక్షలు చేపట్టారు. మెరుగైన పీఆర్సీ ఇవ్వడంతో పాటు ఇతర సమస్యలు పరిష్కరించాలని డిమాండ్‌ చేశారు. ఇటీవల జారీ చేసిన పీఆర్సీ జీవోలను రద్దు చేయాలన్నారు. ఈ నిరసనకు పీడీఎఫ్‌ ఎమ్మెల్సీ లక్ష్మణరావు, ఏపీటీఎఫ్‌ నేత పాండురంగ విఠల్‌ తదితరులు సంఘీభావం ప్రకటించారు. ఉద్యోగుల సమస్యలను ప్రభుత్వం పరిష్కరించాలని నేతలు డిమాండ్‌ చేశారు.