తనయుడి పింఛను కోసం చెట్టెక్కి ఆందోళన

చాగలమర్రి, న్యూస్‌టుడే: మానసిక వికలాంగుడైన తన కుమారుడికి పింఛను ఇవ్వకపోవడంతో ఆవేదన చెందిన తండ్రి చెట్టెక్కి ఆందోళన చేసిన సంఘటన కర్నూలు జిల్లా చాగలమర్రి మండలంలో శనివారం జరిగింది. చాగలమర్రిలోని ముత్యాలపాడు బస్టాండు వద్ద నివసిస్తున్న అమీర్‌బాషాకు ఇద్దరు కుమారులు, కుమార్తె ఉన్నారు. చిన్న కుమారుడు సద్దాం మానసిక వికలాంగుడు కావడంతో పింఛను కోసం దరఖాస్తు చేశారు. ఎన్నిసార్లు మొరపెట్టుకున్నా అధికారులు స్పందించకపోవడంతో తండ్రి అమీర్‌బాషా శనివారం ఇంటి వద్దనున్న వందడుగుల వేపచెట్టు ఎక్కారు. విషయం తెలుసుకున్న ఎస్సై మారుతి సంఘటన స్థలానికి చేరుకుని చెట్టు ఎక్కి అమీర్‌బాషాకు నచ్చజెప్పి కిందికి దింపారు. సమస్యను ఎంపీడీవో షంషాద్‌బాను దృష్టికి తీసుకెళ్లగా.. బాధితుడి ఆధార్‌, ఇతర వివరాలతో సదరం సర్టిఫికెట్‌ ఉంటే వెంటనే పింఛను వచ్చేలా చూస్తామని అన్నారు.